Ministru Justisa (MJ), Manuel Cárceres da Costa, sei orienta tékniku Direcção Nacional Terras Propriedade (DNTP) liu husi Diresaun Cadastrais, identifika rai atu konstroe edifísiu foun Parlamentu Nasionál (PN) iha Hera.
“Ha’u nia prezensa iha PN ita hotu hatene kondisaun laiha dignidade ona ba ita-nia deputadu sira hala’o servisu hanesan órgaun soberánia ida, presiza harii edifísiu ho rezidénsia foun ba deputadu sira”, Governante ne’e ba jornalista sira iha PN hafoin hala’o enkontru ho Prezidente PN, Aniceto Guterres, Kinta (13-08-2020).
Manuel relata, presiza konstroe edifísiu foun ba PN, tanba edifísiu atuál la iha ona espasu natón ba deputadu sira atu halo servisu.
Tuir lei Ministériu Justisa (MJ) mak reprezenta Estadu atu administra bein no moveis Estadu ni’an tomak, tanba ne’e nia parte sei orienta tékniku sira atu identifika rai iha Hera atu konstroe edifísiu foun PN. Ita tenke sees husi Díli sei ba buka fatin iha Hera, tanba iha ne’ebá rai Estadu barak mais ou menus hektare 10 atu bele atribui ba PN hanoin hahú halo konstrusaun edifísiu ho fasilidade tomak, inklui rezidénsia ba deputadu sira”, tenik MJ ne’e.
Iha fatin hanesan, Sekretária Jerál PN, Cedelizia Fária dos Santos, hateten, orsamentu tinan oin PN sei aloka orsamentu ba dezeñu no halo estudu ba edifísiu PN.
“Bazeia ba enkontru ohin pozitivu mais ou menus rai hektare 10 oferese ba PN ninia inísia orsamentu ne’e sei tau iha iha orsamentu tinan oin, hodi halo dezeñu no halo estudu”, akresenta Cedelizia.
Tuir planu iha tinan 2022 sé laiha difikuldade, sei halo lansamentu primeira pedra ba konstrusaun edifísiu foun PN iha Hera. ety
