Komandante Jeral (KomJer) Polísia Nasional Timor-Leste (PNTL) Komisariu Faustino da Costa, deklara, iha Estadu Emerjénsia (EE) ba dahaat ne’e Prezidente Repúblika, Francisco Guterres Lú Olo husu PNTL atu reforsa iha liña fronteira sira atu ema labele ultrapasa arbiru husi dalan ilegál sira.
Nune’e mos komisáriu Faustino da Costa hatete, durante fulan Jullu, tinan ne’e, Polísia Nasional kaptura ema hirak ne’ebé tama sai dalan ilegal iha fronteira hamutuk 149.
“Ami enkontru ne’e semanal, aprezenta situasaun atividade ne’ebé Polísia Nasional halo iha nivel teritoriu nasional, segundu ita hatene Prezidente Repúblika dekreta Estadu Emerjénsia, ne’ebé ami sei foku ba iha parte ne’ebé tuir dekretu Governu nian fo para atu ezekuta Estadu Emerjénsia ida ne’e, ha’u hanoin ida ne’e mak ami koalia, katak ita sei reforsu liu ba fronteira, tanba ita hatene katak fronteira durante ne’e, semana ida tama dala ida ne’ebé Governu autoriza” dehan Komisariu Faustino ba Jornalista sira kinta (06/08/2020) iha Palasiu Prezidensial Nicolão Lobato, Bairo Píte Díli.
Nia hatutan, ilegal deit iha fulan Jullu ne’e, PNTL kaptura tantu ema sira ne’ebé tama ba iha ne’eba, ou parte sorin nian atu mai iha ne’e, ema 149 ne’ebé PNTL sei nafatin reforsa duni iha ne’eba, no agora mekanizmu ne’e komandu nian.
“Prezidente Repúblika husu nafatin PNTL, liu-liu ba asuntu fronteira, alende asegura saida mak iha regra Estadu Emerjénsia, mos oinsa atu haree kondisaun membru sira iha fronteira”,salienta líder másimu PNTL ne’e.
Alende ne’e, Faustino mos akresenta, situasaun teritóriu nasionál ne’e la’o diak, maibe iha Díli laran mak sei iha akontesimentu balun, ne’ebé agora Polísia mos nafatin la’o hela para atu bele hamate aktu husi ema sira ne’ebé iha.
“Komandu mos orienta ona ba iha komandu munisipiu Díli no espesial para buka meius oinsa atu bandidu sira halo krime iha Díli laran ne’e, tenki hamaten ona sira nia kutun, la bele iha kapital ne’e bandidu domina fila fali, tanba ne’e ha’u hanoin ida ne’e ha’u sei la hato’o ba ita bo’ot sira, maibe orientasaun ami fo ona ba komandu Munisipiu no espesial”,tenik Faustino.Oly
