Uma 16 hetan sunu no kareta ida rahun, inklui motorizada ida hetan estragus, hafoin konfrontu iha postu administrativu Laga, munisípiu Baucau.
Tuir Xefe Aldeia Uasilawa, Alberto Pinto Ribeiro, via telefone informa ba GMN katak, kazu sunu uma komunidade ni'an ne’e akontese Kinta semana ne’e, mais ou menus tuku 04:00 madrugada oras Timor-Leste, ne’ebé deskonfia halo husi membru grupu artemarsíais balun ne’ebé mak Governu reativa ona.
“Akontesimentu ne’e ohin dadersan tuku 4 madrugada mak sira mai sunu uma, husi grupu balun Ikatan Kera Sakti ni'an, ne’e mak mai atake grupu PSHT ni'an,” esplika Xefe Aldeia Uasilawa, Alberto Pinto Ribeiro via telefone ba GMN, Kinta (13/08/2020).
Alberto akresenta, iha akontesimentu refere komunidade nia sasan uma laran balun la konsege salva, tanba halai hodi husik hela sira nia uma.
Porta Voz Polísia Nasionál Timor-Leste (PNTL), Superintendente Xefe Arnaldo Araújo, hateten, kazu ne’e submete ona ba prosesu investigasaun, hodi buka hatene kauza husi akontesimentu ne’e.
“Orientasaun husi Komando nian hanesan bain-bain, fó oriéntasaun ba munisípiu hotu para alerta nafatin, primeiru sira nia informadór sira mak tenke la’o maka’as hodi detekta ema balun hakarak estraga no sobu ita nia nasaun ida ne’e, entaun sira bele informa mai Komando hodi bele halo atuasaun ba ema sira ne’e”, Porta Voz PNTL, Superintendente Xefe Arnaldo Araújo, ba jornalista sira, Kinta (13/08/2020), liu husi konferénsia imprénsa iha Kuartel Jerál PNTL Kaikoli, Díli.
Alende ne’e Polísia to’o ona iha fatin akontesimentu hodi neutraliza situasaun no autoridade seguransa buka tuir nafatin suspeitu sira ne’ebé mak envolve iha aktu krime ne’e. avi
