Xefe Estadu Maior FALINTIL-Forsa Defeza Timor-Leste, Majór Jenerál Lere Anan Timur, husu líder nasionál Kay Rala Xanana Gusmão, Taur Matan Ruak, Francisco Guterres Lú OLo, atu fó liman ba malu, hodi haree ba dezenvolvimentu rai ida ne’e.
Tuir Lere Anan Timur, iha tinan rua nulu resin hat iha ai-laran, líder sira hatudu domin ba malu, maibé ohin loron situasaun oin seluk. Tanba ne’e Lere husu ba líder nasionál sira atu hamutuk atu harii futuru nasaun ne’ebé di’ak ba oin.
“Ami apelu mós ba líder nasionál no istóriku sira hotu atu fó liman ba malu. Maun Boot Xanana Gusmão, Maun Taur Matan Ruak no maun Lú Olo atu ita hamutuk. Haree ba kotuk ita nia perkursu iha tinan 24 nia laran, imi-nia komportamentu imi-nia relasaun ba malu, imi-nia domin ba malu, ne’e oinsá. Uluk iha ai-laran ita-nia iis rusa ni’an ka na’n maran ka ita la heuai malu, ita han hamutuk no toba hamutuk, terus hamutuk, maibé ohin loron ita haree situasaun ne’e oin seluk ona. Ami haree lidér sira-nia planu ladun internu ladun arminozu, ami haree katak sira dodook malu hela iha kotuk sira hasoru malu karik, ne’e sira nia segredu nu’udár ita kiik ami la hatene”, esplika Lere Anan Timur, liu husi diskursu aniversáriu FALINTIL ba dala 45, ne’ebé mak hala’o Kinta (20/08/20), iha Kuartel Jenerál F-FDTL, Fatuhada, Díli.
Partisipa iha seremonia aniversáriu ne’e la’ós mai husi militár sira, maibé partisipa husi líder órgaun soberanu, membru Governu no Parlamentu Nasionál, eis Prezidente Repúblika, José Ramos Horta no entidade sira seluk. avi
