GMN TV Justica e Segurança Lere: Maun Xanana hakarak ema ida labele privatiza FRETILIN

Lere: Maun Xanana hakarak ema ida labele privatiza FRETILIN

0 views

Xefe Estadu Maior FALINTIL-Forsa Defeza Timor-Leste (F-FDTL) Majór Jeneral Lere Anan Timur, hateten, uluk sira sei luta iha ai-laran ba independensia teritoriál, komandante Em Xefe FALINTIL, Kay Rala Xanana Gusmão, hateten, kuandu aban-bainrua Timor-Leste ukun-an, laiha ema ida mak privatiza fali FRETILIN ho FALINTIL ba sira-nia interese, tanba ne’e sai hanesan patrimóniu povu ni’an tomak.

Maibé hafoin independensia, líder sira harii nafatin partidu FRETILIN, hodi kompete ho partidu sira seluk ba kaer ukun.

“Primeira konferénsia nasional iha 1981, laiha dokumentu ida mak hakerek mas ami iha konferénsia nia laran, ami koalia kona-bá partidu polítiku no líder rezisténsia nini’an, maun Xanana dehan hanesan ne’e, abanbainrua ita ukun-an, FRETILIN no FALINTIL sai patrimóniu do povu, ema ida labele privatiza, e ita líder sira tantu iha liur tantu ita líder sira frente armada kuandu ita ba villa, ita sai árbitu, quer dizer ha’u hanoin ida ne’e di’ak. Mas kuandu ita tama mai, FRETILIN sai partidu nafatin, UDT sai partidu, partidu foun mosu, maun Xanana harii nia partidu CNRT, entaun partidu ne’e iha interese polítiku, iha ambisaun”, dehan Lere ba GMN iha Bebora, Díli, Kinta (20/8/2020).

Tuir Lere, kuandu harii partidu polítiku objetivu ikus mak hakarak ba kaer ukun no molok atu to’o iha ukun, tenke iha programa hafoin povu hili hodi sa’e ba ukun.

“Por ezemplu kuandu ema harii partidu polítiku ne’e la’ós harii de’it, la’ós hanesan polítiku sira dehan katak, serve nasaun, serve povu, primeiru o ba bosok depois mak o serve. Porque o la bosok, o labele sai boot. Por ezemplu o ba ne’e, ha’u-nia partidu ne’e abanbairua mak manan ha’u ukun, ha’u halo estrada alkatraun husi loro-monu to’o loro-sa’e, ha’u halo estrada liga husi Díli ba Ataúro, ne’e se mak lakohi programa ida ne’e, pois foti tiha nia, hein-hein estrada nunka husi Díli ba Ataúro. Nia mate mós estrada la to’o, mas nia sai Ministru ona. Entaun ne’e mak ha’u hanoin katak, buat ne’e ami-nia ida mak ne’e ona. Maun Xanana 76 anus ona, maun Marí 70 i tal anus, Ramos Horta 70 i tal, ami sira ne’e mós atu tama ona ba 70, eipa keta tarde ona karik?”, hatutan Lere.

Lere lia tun tan katak, haree ba jerasaun tuan sira idade avansa ba dau-dauk, mak jerasaun foun sira tenke maduru ona no hatudu ona iha prátika, atu nune’e abanbairua lori nasaun ne’e ba oin ho di’ak liu.

“Ha’u hanoin katak ita-nia jerasaun foun tenke maduru ona, maduru ne’e mak ha’u mós sadik bei-beik intelektuá sira, imi loro-loron imi haree oiiii maun boot sira hanesan ne’e, hanesan ne’eba, nusa imi mós la hatudu ona katak, ami mós bele! Por ezemplu iha frente armada nini’an, iha tinan 1992 uluk antes ha’u rasik mós dehan hanesan ne’e, Xanana mak ema kaer ka ema oho ne’e ita lakon ona funu, tinan 1992 ema kaer tiha, kaer tiha agora nusa funu ne’e ita lakon tebes ka lae? Ita dehan Xanana lakon, Xanana ida tenke mosu fila-fali, entaun momentu ne’e saudozu Konis Santana avansa pois Konis mate, Taur Matan Ruak avansa fali, sé Taur mate ita avansa nafatin to’o mate mohu. Agora mós hanesan ne’e, ita labele hein de’it impase polítiku ne’e. Agora sé imi intelektuais labele haree de’it hanesan ne’e, imi tenke toma ona inisiativa, maibé sira dehan fali hanesan ne’e, eiii ami atu halo mós kestaun morál, pai sira sei moris ne’e, pais sira sei tur iha meza ulun ne’e, book-an la di’ak bee, ida ne’e problema ne’e, ne’e reflesaun ba ami hotu”, dehan tan Lere.

Entretantu deputadu bankada FRETILIN, José Agustinho Sequeira ‘Somotxo’, hateten, situasaun sira hanesan ne’e halo nia mós preokupadu no triste ho líder partidu polítiku sira dook malu hodi lori rai ne’e ba oin.

“Ha’u triste líder polítiku sira la tur hamutuk. Ezemplu ida hanesan ne’e aat ba jerasaun foun. Ha’u hanoin la’ós difísil atu ita tur hamutuk. Líder sira na’in hira hanesan maun Xanana, Dr. Marí, Dr Ramos Horta, Jeneral Lere mak tur iha ne’e, ho Prezidente Repúblika atual, ha’u hanoin tenke buka dalan porque ita-nia destinu mós ita la hatene”, tenik Somotxo hanesan mós eis membru FALINTIL ne’e. GMN


Banner

Foto

Notisia Ikus

Komisaun rekrutamentu publika ona naran kandidatu F-FDTL foun

September 16, 2021
Komisaun rekrutamentu FALINTIL-Forsa Defeza Timo...

PR-PPN la marka prezensa abertura sesaun lejislativa da-haat

September 16, 2021
Kada tinan Parlamentu Nasionál (PN) sempre halo...

CNRT-PD no KHUNTO preokupa OJE 2021 "la folin"

September 16, 2021
Parlamentu Nasionál (PN), liu hosi Bankada opoz...

Promesa barak Governu seidauk realiza

September 15, 2021
Parlamentu Nasionál (PN) períodu resesu durant...

PM Taur rekuperadu husi COVID-19

September 15, 2021
Primeiru Ministru (PM), Taur Matan Ruak, rekuper...
1 2 3 639

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker