Polísia Siéntifika Investigasaun Kriminál (PSIK) ezekuta mandadu detensaun Tribunal Disritál Díli (TDD) hodi detein suspeitu HAD no suspeita RA, ne’ebé deskonfia soe bebé iha Ailok-Laran.
Iha Segunda (24/08/20) PSIK ezekuta mandadu detensaun husi Tribunál Disritál Díli ho númeru NUC 0134/20, hodi kaptura suspeitu HDA deskonfia nu’udar aman no suspeita RA nu’udar inan ne’ebé soe bebé iha Ailok-Laran, iha loron 16, fulan ne’e.
Adjuntu Diretór, PSIK Adino Nunes Cabral, hateten, ema na’in rua, sei aprezenta ba Tribunál, hodi tuir primeiru interogatóriu, atu nune’e, bele aplika medida koasaun.
“Iha semana kotuk ita simu ona mandadu detensaun husi tribunál . Hanesan ha’u hateten ona iha semana liu ba katak, ita husu ona ba tribunál atu imiti mandadu detensaun ba suspeitu na’in rua. Semana kotuk ita simu ohin ita ezekuta duni, ita boot sira akompaña ita ezekuta mandadu detensaun ba suspeitu na’in rua, agora mane ne’e iha hela sela, bebé nia inan mak ita konfiansa di’ak ho uma mahon FOKUPERS ni’an, ita titip hela iha ne’ebá, ita hein para aprezenta sira ba iha primeiru interogatóriu judisial, hodi aplika medida koasaun ba sira na’in rua”, esplika Adjuntu Diretór PSIK, Adino Nunes Cabral, ba jornalista sira Segunda (24/08/20), iha edifisiu PSIK Kaikoli, Díli.
Antes ne’e mós, suspeita RA no suspeitu HDA, PSIK halo ona identifikasaun durante oras 12 rua.
Total kazu soe bebé ne’ebé mak PSIK atende hamutuk lima, hahú iha tinan 2017 to’o agora tinan 2020 ne’e. avi
