Prokuradór Jerál Repúblika (PJR), José da Costa Ximenes, informa, Ministériu Públiku (MP) foti ona desizaun katak semana oin sei halo destruisaun ba matéria báziku droga ho tonalada 160 resin, ho métodu sunu, atu nune’e labele fó impaktu ba saúde públika no meiu ambiente.
“Semana oin ita sei halo destruisaun ba objetos do crimes 160 toneladas ou kontentor 9 ne’ebé nia advogadu dehan di’ak liu haruka ba Indonézia, ami deside tiha ona depois de ha’u nia adjuntu rasik mak organiza hamutuk ho órgaun Polísia Kriminál no entidade sira, liu liu Sekretária Estadu Meiu Ambiente nini’an, rona sira nia hanoin ka opinioens métodu destruisaun halo oinsa mak di’ak liu, rona mós Polísia Investigasaun Sientifika Kriminal ké sira iha tékniku balun hatene kona-bá ida ne’e, rona mós husi parte Ministériu Saúde (MS) hamosu konklusaun ikus mak rua, ida mak destruisaun ho métodu hakoi, ida seluk mak ita sunu deit”, PJR ne’e ba jornalista sira, Tersa (18/08/2020), iha Palásiu Prezidensial Nicolau Lobato, Bairo Píte, Díli.
Nia salienta, Hospital Nacional Guido Valadares (HNGV) iha kondisaun ba métodu rua ne’e no desizaun ikus ne’ebé sira foti métodu ida ne’ebé seguru no labele fó impaktu ba saude públika, labele fó impaktu ba meiu ambiente mak tenke sunu, tanba realiza destruisaun ho métodu sunu ne’e ba dahuluk istoria MP ni’an ne’ebé konsege halo aprensaun ba 160 tonelada matéria báziku ba droga.
José akresenta mós katak, depois de 160 i tal tonelada ne’e destroi, uza ho métodu ida ne’ebé seguru liu mak tuir mai sei halo tan destruisaun ba 3.53 kilograma droga ne’ebé kaer iha Timor Plaza iha loron 14, fulan Janeiru, ba droga puru hotu, planu realiza iha ferias judisiáriu, ho ida ne’e bele halo jestaun di’ak liu, la implika ba servisu seluk MP. Oly
