Juíz Argentino Nunes, informa, razaun tribunál aplika pena prizaun tinan ida, fulan neen ba kondenadu Juga Fernandes Sousa Gama “Juga Gama” no Alcino Mendes Pereira ba Krime Evazaun ne’ebé previstu iha artigu 246 Kódigu Penál Timor-Leste, tanba faktu provadu katak, iha tinan 2013, kondenadu na’in rua halai sai husi prizaun Becora, hodi ba Nusa Tenggara Timur (NTT) Indonézia.
Faktu ne’ebé la provadu mak, deklarasaun sasin sira ni’an hateten, kondenadu sira halai sai duni, maibé la estraga odamatan no janela prizaun ni’an no hakilar guarda prizioneiru sira iha prizaun laran, ne’ebé deskreve iha akuzasaun Ministériu Públiku (MP) ni’an.
Antes ne’e MP, husu tribunál atu absolve arguidu na’in rua husi krime Dezobediénsia ne’ebé previstu iha artigu 244 no krime Furtu Agravadu artigu 252, tanba konsidera krime dezobediénsia ne’e hanesan konkursu ba norma, nune’e krime refere, tama iha Krime Evazaun.
Tanba ne’e, iha desizaun finál, tribunál absolve arguidu Alcino Mendes Pereira husi krime Furtu Agravadu, tanba laiha prosedimentu kriminál ka keixa husi lezadu.
Nune’e tribunál kondena, kondenadu sira ho Krime Evazaun ho pena ne’ebé hanesan ba arguidu na’in rua.
Antes ne’e, tribunál kondena ona kondenadu sira ho pena prizaun tinan 10 ba Juga Gama, tanba komete krime tráfiku ilísitu ba droga no Alcino Mendes Pereira kondena ho pena prizaun tinan 26, tanba komete krime omisídiu agravadu.
Kodenadu na’in rua halai sai husi prizaun Becora iha loron 3, fulan Novembru, tinan 2013 ba Indonézia no hetan kapturasaun fali husi (Kepolisian Daerah Republik Indonesia (KAPOLDA-RI), iha loron 3, fulan Novembru, tinan 2017.
Leitura ba sentensa ne’e, prezide husi juíz singular, Argentino Nunes, MP reprezenta husi prokuradór, Jacinto Babo no kondenadu sira hetan asisténsia legál husi defensór públiku. san
