Unidade Patrullamentu Fronteira (UPF) iha semana ne’e, kaptura membru arte marsiál Persaudaran Setia Hati Terate (PSHT) na’in hitu, tanba tenta atu hakat liu liña fronteira, hodi ba saé sintu iha Timor Osidentál-Indonézia.
Lia hirak ne’e hato’o husi Komandante UPF, Superintendente João Sancho Pires ba jornalista sira Kuarta (26/08/20), iha Sentru Formasaun Polísia Comoro, hafoin partisipa iha enkontru kona-bá partilla informasaun seguransa no prevensaun surtu COVID-19, iha área fronteira Timor-Leste, entre instituisaun Estadu no parseiru internasionál.
Maske dau-dauk ne’e Estadu Timor-Leste implementa hela Estadu Emerjénsia (EE), hodi halo prevensaun ba surtu COVID-19, iha liña fronteira, labele tama iha nasaun ne’e.
Maibé Timor-oan sira ne’ebé husi grupu arte marsiál balun Governu reativa ona, kontinua la kumpre regra EE, tenta liu husi dalan ilegál hodi ba sa’e sintu iha Timor Osidentál, Nusa Tenggara Timur (NTT), Indonézia.
Ikus mai membru UPF, hetan sira hodi halo kapturasaun no entrega ba PNTL munisípiu Bobonaro, atu kontinua loke prosesu investigasaun.
“Sira ne’e grupu PSHT atu la’o ba sorin halo pengesahan, maibé ita-nia membru UPF ne’ebé mak patrulla hamutuk ho membru FALINTIL-Forsa Defeza Timor-Leste (F-FDTL), ita kaptura ema na’in hitu, iha área Nunura, Memo-Maliana nini’an, ita kaptura halo identifikasaun, ita entrega ba Komando PNTL munisípiu Bobonaro atu prosesa tuir lei”, esplika Komandante UPF, Superintendente João Sancho Pires.
Dau-dauk ne’e UPF ho forsa armada kontinua hala’o movimentu iha fronteira, hodi kontrola fronteria sira hodi halo prevensaun ba COVID-19 no importasaun no esportasaun liu husi dalan ilegál. avi
