Komisaun Anti Korrupsaun (KAK) konsege salva osan Estadu USD 66.301,56 husi empreza haat, iha implementasaun programa Sesta Bázika, tanba distribui produtu sira la tuir item ne’ebé sita ona iha kontratu.
“Hosi intervensaun, KAK konsege salva osan rihun 66.301,56 hosi kompañia 4 ne’ebé la kumpre sira nia kontratu,” informa Adjuntu KAK ba Asuntu Prevensaun no Sensibilizasaun, Luis de Oliveira Sampaio, ba Jornalista sira, Segunda (16/08), iha Caicoli-Díli, hafoin partisipa iha lansamentu relatóriu monitorizasaun programa Sesta Bázika.
Osan ne’ebé Governu aloka ba programa Sesta Bázika ne’e, hamutuk millaun USD 71.5, ne’ebé implementa hahú iha fulan Novembru no Dezembru tinan 2020.
Implementasaun programa ne’e atinje ona 100%, ho númeru benefisiáriu hamutuk tokon 1.454,246, iha territóriu nasionál, maibé família rihun 25.382 nia naran sei iha lista reklamasaun.
Governu sei rezolve lista reklamante benefisiáriu Sesta Bázika 25.382
Lista pendente benefisiáriu ba programa Sesta Bázika, Ministériu Koordenadór Asuntu Ekonómiku (MCAE-sígla portugés) nu’udar ministériu implementadór sei rezolve iha fulan Agustu ne’e.
Benefisiáriu sira ne’e naran la tama iha fixa família ne’ebé ekipa sira rekolla, maibé sei tama iha lista reklamante.
“Prosesu distribuisaun Sesta Bázika finaliza ona, maibé sei hela lista benefisiáriu reklamante sira hosi Munisípiu sira hamutuk rihun 25 resin, ne’ebé planu Governu nian sei rezolve iha semana rua oin mai,” komfirma Koordenadór Jerál Sesta Bázika (MCAE), Fernando Araújo, iha salaun FONGTIL Caicoli.
Númeru benefisiáriu pendete ne’e, maiória husi Munisípiu Ermera ho númeru rihun 6 resin, Munisípiu Díli rihun 3 resin, no restante husi Munisípiu seluk no RAEOA.Fel
