Komunidade Aldeia Turelau, Suku Tibar, Postu Administrátivu Bazartete, Munisípiu Liquiça, hetan mate isin ida latan hela iha mota ninin área Ismaik nian, iha Sesta (13/08).
Leonardo Fatíma, nu’udar sasin hatete, nia hetan mate isin Afonso Ribeiro, bainhira hatudu husi estudante balun ne’ebé liu husi área Turleu nian, hafoin nia informa ba Komando PNTL Munisípiu Liquiça, hodi dada liña Polísia, hodi halo identifikasaun.
“Ohin dader lori ha’u nia oan ba eskola ha’u sa’e mai iha oras tuku walu liu menutu lima, alin mane ida hamriik iha ne’ebá nia haree mate-isin entaun nia para hau, nia dehan, Maun ema ida mate hela iha kraik, ne’e mak hau para motor no haree tiha mate ne’e. Ne’e mak hau hateten ba alin ne’e, o hein iha ne’e hau ba uma telefone Polísia mai to’o iha ne’e para haree,” esplika sasin ne’e, ba GMN iha Ismaik, Tibar, Liquiça.
Parte família matebian, hakarak mate isin submete ba prosesu autópsia hodi bele hatene motivu husi matebian nia mate.
“Ami husi família Vitima hakarak prosesu ne’e la’o ba oin no ita la bele naran deskonfia de’it no ita hatene lolos lai bukti, ne’e duni husi família matebian nia hakarak ba autópsi no tuir lei ne’ebé iha,”dehan Alberto Tomas.
Afonso Ribeiro nu'udar abitante aldeia Turleu, suku Tibar, Munisípiu Liquiça, mate husik hela nia fen ho oan nain lima no matebian nu’udar seguransa iha Ismaik.Avi
