Membru Polísia ida husi unidade Batallaun Ordem Públika (BOP) Kompaña Alfa, Tersa (3/8), ne’e mate derepente iha servisu fatin, Caicoli, tanba deskonfia atake kardíaku.
Nune’e membru (BOP) sira hakfodak, bainhira haree Ajente Xefe Venancio Menezes toba latan hela iha fatin no laiha ona iis.
Hafoin ne’e, Ekipa Pilar III husi Sentru Integradu Jestaun Krize (SIJK) to’o kedas iha fatin, foti amostra husi matebian nian, hodi ba halo teste iha laboratóriu.
Husi rezultadu teste, hatudu negativu COVID-19, nune’e ekipa Polísia FORENSIK falun mate-isin, no entrega kedas ba família matebian.
Tuir informasaun husi Polísia, matebian iha Segunda, loron 2, fulan ne’e foin fila husi Postu Administrativu Uatolari, Munisípiu Viqueque, partisipa seremonia kulturál.
Bainhira to’o iha Díli, Ajente Xefe ne’e kontinua ba Kuartel BOP mais ou menus tuku 11 kalan oras Timor-Leste, hodi deskansa.
Nune’e iha Tersa ne’e, nia kolega sira fanu Venáncio Menezes atu hala’o servisu, maibé iis laiha ona.
Relasiona ho Venáncio Menezes nia mate, Jornalista sira tenta halo konfirmasaun ho família matebian, maibé sira lakohi fó komentáriu.
Matebian Venáncio Menezes, moris iha Postu Administrátivu Uatolari, Munisipiu Viqueque iha loron 7, fulan Juñu, tinan 1976, no sai membru PNTL tinan 2001.Avi
