Ministériu Justísa (MJ) hein hela notifikasaun husi tribunál, kona ba prosesu providénsia kautelár ba restiuisaun pose, ne’ebé hato’o husi rekerente hasoru MJ, luhosi Diresaun Nasionál Terras no Propriedade (DNTP) no PNTL nu’udar rekeridu.
“Formalmente ministeriu justisa seidauk simu notifikasaun husi tribunál, ne’ebé hau hein de’it, tribunál notifika mai mak ministeriu responde,” informa MJ Manuel Cárceres, Segunda (09/08), iha knaar fatin Caicoli.
Advogadu Privadu Júlio da Silva esplika, desizaun tribunál nia deside ona parte rekeridu ka Estadu atu entrega fali pose ka objetu ne’ebé iha ba rekerente atu uza provizoriamente.
Tanba iha provas ne’ebé rekerente aprezenta ba tribunál katak, rai ne’ebé okupa nu’udar eransa husi tinan 1922, no hetan ona sertifikadu rejistu husi Sistema Nasionál Kadastru (SNC-Sígla Portugés), iha tinan 2012.
“Entaun agora tribunál deside atu foti fila-fali. Restitui ne’e dehan fó fila fali ninia pose para nia bele kontinua goza. Pose ne’e hanesan nia bele usu efetivu ba iha niania rai, kualker nia halo atividade saida iha leten provizoriamente tribunál deside ida ne’e. Maibé atu deside kona-ba se mak atu na’in lolos ne’e, ita sei hatama fali asaun prinsipál,” esplika Advogádu ne’e via telefone.
Antes ne’e iha loron 25, fulan Juñu ne’e, parte sira halo despezu administrativu ho forsa, hodi suru parsela rai ho medida 8x45, ne’ebé tama mós iha konstrusaun alargamentu edifísiu foun PNTL nian.Ags
