Forum Organizasaun Naun Governamentál Timor-Leste (FONGTIL), lamenta aktu elementu Polísia Nasionál Timor-Leste (PNTL) Munisípiu Ermera ne’ebé halo agresaun fíziku hasoru sidadaun nain haat inklui labarik minoridade ida, to’o baixa iha Ospitál.
Diretór Ezekutivu FONGTIL, Daniel dos Santos Carmo, konsidera, komandante PNTL Munisípiu Ermera nia postajen iha média sosiál facebook, ne’e hanesan aktu auto defeza hodi defende elementu ne’ebé viola Direitu Umanu.
“FONGIL lamenta tebes ho komadante PNTL Munisípiu Ermera, ne’ebé halo defeza ba nia membru sira, ne’ebé halo agresaun fíziku hasoru vítima sira, inklui labarik minoridade ida, liu husi tau iha nia status facebook katak, kazu rezolvidu, ne’e hanesan status defende bandalizmu no premasizmu atu buras iha instituisaun PNTL” kestiona Diretór FONGTIL, iha Díli, Semana ne’e.
Sosiedade Sivíl husu Komando Jerál PNTL no Provedória Direiru Humanus no Juatísa (PDHJ), atu loke prosesu investigasaun ba komandante PNTL, Munisípiu Ermera, hodi prosesu tuir dalan justisa.
“FONGTIL husu Komandu Jerál PNTL atu halo investigasaun ba Komadante PNTL munisipiu ermera” dehan nia.
Kazu agresaun fízika ne’e, akontese iha Kinta (26/08), oknum polísia halo hasoru sidadaun na’in haat mak hanesan, Joaquim António da Conceição, Profirio Agapito de Araújo, Ferderico de Deus da Costa, Tiago da Cruz, iha fronteira Munisípiu Liquiça-Ermera no inklui labarik, minoridade ida ho tinan 13, ho naran Flávio Seixas Martins, iha Gleno Múnisipiu Ermera, to’o baixa iha ospitál.Ags
