GMN TV Justica e Segurança Ró Tranship II kontratu termina, “prosesu investigasaun kontinua”

Ró Tranship II kontratu termina, “prosesu investigasaun kontinua”

67 views

Ministériu Transporte no Komunikasaun (MTK) termina ona kontratu ho Ró Tranship II iha Sesta, loron 13, fulan Agustu ne’e, maibé la implika prosesu investigasaun ne’ebé Komisaun Anti Korrupsaun (KAK) halo hela ne’e.

Tanba ne’e KAK iha Segunda, loron 16, fulan ne’e, ezekuta mandadu ho númeru rejistu krime 0007/21.CAC TL/ hodi halo buska domisiliáriu no aprensaun ba dokumentu sira, relasiona ho prosesu aluga Ró Tranship II nia, iha Administrasaun Portu Timor-Leste (APORTIL).

Mandadu buska no aprensaun ne’e, KAK ezekuta direta ba Diresaun Cabotajen Nasionál, ne’ebé tutela iha APORTIL.

Tanba durante ne’e, Diresaun Cabotajen Nasionál mak halo inspesaun ba transporte marítima ne’e, hodi rekomenda ba MTK foti desizaun aluga ró ne’e.

“Ohin ita bo’ot sira akompaña, dokumentu esensiál ne’ebé mak iha hanesan kontratu sira prosesu sira aprosvizionamentu oinsá ró ne’e mai no kontaku sira, ita mós asegura hela komunikasoins sira liu-liu telefone nomós ekipamentu seluk hanesan komputadór ne’ebé mak Diretór Cabotajen ne’e uza para depois ita husu lisensa husi tribunál hodi loke dokumentu sira ne’e para ita haree evidénsia iha laran ita foti hodi fasilita prosesu Investigasaun,” informa Pontu Vokál Operasaun KAK, Euclides Madeira, iha edifísiu KAK, Farol, Díli (16/08).

Iha mandadu ne’e, KAK mós halo identifikasaun ba Diretór Cabotajen Nasionál, ho inisiál FDC, ne’ebé deskonfia envolve iha prosesu aluga Ró Tranship II.

Mesmu MTK termina ona kontratu ho empreza Atarlapan Estrategi Lojistik, hodi fila ba Indonézia, maibé la fó impaktu ba prosesu investigasaun ne’ebé dadaun ne’e la’o hela.

“Ró ne’e sai iha Sesta Feira ba Indonézia, la fó impaktu ba prosesu investigasaun ne’ebé mak ita halo, ba oin nafatin” tenik Pontu Vokál ne’e.

Mandadu buska no aprensaun ne’e, akompañamentu husi Polísia Nasionál, Servisu Investigasaun Kriminál (PNSIK).

Iha loron 13, fulan ne’e, Prezidente APORTIL Flávio Neves deklara, MTK termina ona kontratu Ró Tranship II to’o deit fulan rua, tanba laiha ona osan hodi estende kontratu, ba operasaun transporte marítima ne’e.

Nune’e Governu konsege halo ona pagamentu fulan rua nian, ba empreza ne’ebé kontrata, hamutuk rihun USD 440.000.

Kontratu ne’ebé halo Governu asina ho empreza Atarlapan Estrategi Lojistik ne’e, kontrata durante fulan tolu, ho nia viajen kada semana dala ida, Díli Ataúro no Díli Oecusse.

Dadus ne’ebé GMN asesa husi APORTIL hatudu, hahú iha loron 21, fulan Maiu, to’o loron 21, fulan Jullu ne’e, Ro Tranship II  halo ona operasaun ba mai Oecusse dala neen, no Ataúro dala sanulu.

Ró Tranship II, KAK deskobre katak, mosu irregularidade balun iha prosesu aprovizionamentu, no KAK mós submete ona auto partisipasaun ba Ministériu Públiku (MP) hodi hein delegasaun kompeténsia.Avi


Banner

Foto

Notisia Ikus

PPN-Konselleiru KHUNTO deskute plataforma entendimentu OJE 2022

September 24, 2021
Konselleiru máximu Partidu KHUNTO, José dos Sa...

Posibilidade semana oin, Governu sei la estende tan SS iha Díli

September 24, 2021
Diretór Sala Situasaun Sentru Integradu Jestaun...

FRETILIN: Ema balu tenta destrói amizade Taur-Alkatiri iha MedSos

September 23, 2021
Xefe bankada FRETILIN, Francisco Miranda Branco,...

Governu propoin PR Lú Olo renova EE

September 23, 2021
Governu kontinua propoin, ba Prezidente Repúbli...

Governu hakotu SS iha munisípiu tolu, Díli mantein

September 23, 2021
Governu iha reuniaun Konsellu Ministru (KM), Kua...
1 2 3 643

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker