Membru Forsa Rezerva Munisípiu Díli baku membru RENETIL Juventude Loriku Asuain, Andre Rangel Gomes, matan fukun metan no isin lolon parte hirus matan kanek to’o nakles.
Kazu refere akontese iha loron 1, fulan Setembru, tinan ne´e, hafoin partisipa seremonia festa kazamentu iha Delta Nova, Dili, mais ou menus tuku 03:00 madrugada oras Timor-Leste.
Hafoin akontesimentu remata família evakua kedas vítima Andre, husi fatin akontesimentu Delta Nova ba iha Hospital Nacional Guido Valadares (HNGV) hodi halo tratamentu ba ninia saúde.
Tanba ne´e iha Segunda loron 3, fulan Setembru, tinan ne´e, vítima hamutuk ho Sosiedade Sivil liu-liu Asosiasaun HAK ezije atu Komando foti lalais desizaun ba membru PNTL Díli, ne´ebé mak baku vítima Andre Rangel Gomes.
Vítima Andre Rangel Gomes, haktuir, kronolojia akontesimentu ne´e katak, kazu ne´e akontese wainhira nia haree joven ida ne´ebé mak finjidu hateten nia a´an nudar pesoal forsa balun hodi baku joven ida to’o hetan kanek. Tanba ne´e wainhira Andre Rangel haree problema ne´e atu ba hakalma, maibe membru Forsa Rezerva kuaze ema nain 6 baku Andre Rangel monu tun ba rai.
``Akontesimentu ne´e iha tuku 03:00 madrugada, ha´u-nia primu ida hetan asaun kekerasan husi ema ida ne´ebé mak mengaku nia a´an hanesan forsa. Entaun suspeitu ida mengaku a´an hanesan forsa ne´e lori botir baku primu ne´e, kebetulan ha´u sai ba haree fali primu ne´e liman ran. Primu ida hetan kanek hateten mai ha´u dehan, ema lori botir sona ha´u nia matan, ne´ebé ha´u tahan ha´u-nia liman ran tiha. ha´u simpati ba primu nia problema ha´u ba hasoru irmaun ne´ebé mak mengaku a´an hanesan forsa ne´e, ha´u ba husu koalia ho nia depois ami koalia maka´as oituan ba malu, Polísia Task Force ida mak tuku kedas ha´u monu ba rai, la kleur de´it sira seluk mai ataka tan ha´u hodi tuku ha´u-nia matan no inus ran no isin lolon parte hirus matan nakles depois primu sira mak tula ha´u ba Hospital,``esplika Vítima Andre Rangel Gomes, ba Jornalista sira liu husi konferensia imprensa, Segunda (03/09/18), iha Asosiasaun HAK, Farol, Díli.
Nune´e mós Manuel Monteiro Fernandes, konsidera asaun membru PNTL Munisípiu hodi baku vítima Andre Rangel Gomes, hanesan aktu violasaun direitu humanu. Tanba ne´e nia husu Komando Jeral PNTL loke prosesu investigasaun.
``Membru PNTL ne´ebé mak halo agresaun fíziku, konsidera violasaun diretus humanus, tanba komete husi Instituisaun seguransa sira hasoru ema sivil ne´ebé mak laiha kbi´it, iha tempu ne´eba kedas ema nia dignidade ne´e kiik tiha, entaun ho atitude ida ne´e ami kondena no husu ba Komando PNTL atu prosesa kazu ne´e hodi demiti membru Forsa Rezerva ne´ebé mak komete aktu violasaun iha dia 1 de Setembro 2017, dadersan 3 oras madrugada, wainhira haksesuk malu, balun ne´ebé mak lanu Forsa Rezerva too sira la husu vítima ho suspeitu mak ne´ebé, maibe sira baku ema arbiru to’o ikus sira baku fali irmaun Andre Gomes ne´ebé mós hanesan sobrevivente 12 Novembru no mós hanesan membru RENETIL,``dehan Manuel Monteiro
Xefe Departementu Jutisa PNTL Superintendente, Orlando Gomes, hateten, liga ba kazu ne´e Servisu Departementu Justisa PNTL hetan ona briefing husi Komando Jeral PNTL atu loke lalais prosesu investigasaun ba membru PNTL sira ne´ebé mak komete iha kazu refere.
``Ligasaun ba kazu refere Komando hetan ona informasaun ho evidensia balun vítima nia imajen, ida ne´e mak sai hanesan faktus atu nune´e Komando bele loke prosesu ba membru, tuir informasaun katak membru Task Force, maibe depois ita halo abertura ba prosesu kriminal depois mak ita hatene membru sira-nia asaun hasoru vítima,``dehan Orlando Gomes.
Entretantu tuir artigu 147 Polísia sei defende de´it legalidade demokrátiku no garante sidadaun sira-nia seguransa internu, no sira labele iha partidu polítiku.Wainhhira halo prevensaun kriminál ténki ho respeitu ba direitu umanus.avi
