Komandante Polísia Nasionál Timor-Leste (PNTL), Munisípiu Díli, Superintendente Xefe Pedro Belo, hateten, kazu suspeitu inisial TA ne´ebé mak ta´a kanek João do Rosário la´os flagrante delicto husi autoridade seguransa, tanba ne´e suspeitu detein de´it ho oras 12 iha sela detensaun, maibe prosesu investigasaun ba suspeitu la’o ona.
Alende n´e Pedro Belo husu vítima labele fó sala de´it ba membru Konsellu Polisiamentu Komunitária (KPK) nia servisu, maibe prosesu ba kazu ne´e sei la´o hela.
``Ha´u hanoin kazu nia prosesu la’o dadauk ona ita labele tau sala ba membru KPK ho membru Polísia sira, presiza halo investigasaun. Ema hotu bele hato’o lamentasaun, dala ruma sira mós la kontente atendimentu Polísia nian, la kontente ho atendimentu KPK nian, maibe liu husi prosesu investigasaun mak bele haree. Ita labele komentariu dehan ita la gosta ema ida, la gosta sira-nia atuasaun, maibe ténki liu husi investigasaun mak bele hatene los ka sala``,esplika Pedro Belo, ba jornalista sira, Kinta (27/09/18), iha Kuartel PNTL, Díli.
Husik livre (liberta) ema ne´ebé hetan detensaun, tuir artigu 223 husi kódigu prosesu penal dehan katak, ofisial autoridade judisial ka Polísia nian ida ne´ebé fó orden hodi kaptura ka detein ema ida, ténki husik ka liberta kedas ema ne´ebé tahan ne´e haktuir situasaun hirak tuir mai ne’e; 1. Iha kazu ne´ebé identifika ka kaer sala ema; 2. Iha situasaun ne´ebé la haktuir lei, hanesan tahan liu tiha prazu legal ne’ebé lei fó oras 72; no 3. Wainhira la presiza tan deklarasaun husi ema ne´ebé hetan detensaun ne´e.
Vítima João do Rosário, hetan taa husi suspeitu iha iha loron 23 fulan Setembru, tinan ne´e, mais ou menus tuku 3 madrugada oras Timor-Leste, hodi rezulta vítima nia ulun nakles, suku pontu sia no ulun kanek fatuk 18.
Entretantu tuir lei arma branka númeru 5/2017/ bandu tebes ema kaer sasan kroat hodi ta’a kanek ema seluk.avi
