Komandante Jerál Polísia Nasionál Timor-Leste (PNTL), Komisáriu Faustino da Costa, hateten, PNTL kaptura ona membru Persaudaraan Setia Hati Terate (PSHT) hamutuk 290, hafoin ba sa’e sintu iha Atambua, Indonézia iha tempu Estadu Emerjénsia (EE) nia laran.
“PNTL iha EE ne’e kaer ona ema membru arte marsiál ne’ebé mak ba sa’e sabuk, liu-liu la’os atu ita jeneraliza, PSHT ne’e ita halo kapturasaun ne’e 290 pesoas, ne’e mak ita kaer iha EE, maiória iha kuarentena”, Komandante Jerál PNTL ne’e ba jornalista sira, Kinta (17/09/20), hafoin hala’o enkontru semanál ho Prezidente Repúblika (PR), Francisco Guterres Lú Olo, iha Bairo Píte, Díli.
Atu prevene ema labele lori COVID-19 tama Timor-Leste, Komandu PNTL koloka membru Unidade Polísia Marítima (UPM), hodi kontrola tasi área Liquiça to’o Batugade.
Iha fronteira rai-maran ninian, líder máximu institituisaun PNTL ne’e dehan, membru Unidade Espesiál Polísia (UEP) reforsa Polísia Unidade Patrullamentu Fronteira (UPF), hodi nune’e bele kontrola di’ak liu tan atu nune’e bele halo prevensaun ba moras aat COVID-19. avi
