Vise Xefe Estadu Maiór F-FDTL, Brigadeiru Jeneral Falur Rate Laek hateten, grupo Ângela Freitas, laiha kapasidade mobiliza no influensia povu tanba ne’e uza fotografia Xanana Gusmão no tabele ba parte Igreja.
“Sira laiha kapasidade mobilizasaun, sei sira kapasidade no iha influensia ba povu tanba saida sira Xanana nia foto no tabele ba amo sira,” dehan, Vise Xefe Estadu Maiór Jeneral F-FDTL, Brigadeiru Jeneral Falur Rate Laek, bainhira partisipa, programa Grande Entrevista iha studio 2 GMN, Bebora-Díli, Kinta (03/09/2020).
Falur Rate Laek subliña liu tan, sé sira iha kapasidade influensia no mobilizasaun sira kaer partidu, tanba saida la ba kaer ukun, tanba ne’e labele monu fali ba ema ida hanesan ne’e.
Falur esplika, serku ne’e signifika forsa ho kareta ba haleu Ángela, maibé forsa sira ba hamriik iha estrada mós dehan la diak ou iha lei ruma bandu atu forsa ruma ba hamriik iha uma ne’eba.
“Ami hatene sira ne’ebé ho konseitu kontra hela deit ne’e sira mak nafatin hela deit, tanba ami hatene sira ne’e jente ida kontradisaun no pior liu sira laiha aseitasaun no sira dehan kansela sira nia manifestasaun, tanba hetan presaun husi forsa ne’e bosok no lalos,” tenik, Brigadeiru Jeneral Falur.
Falur hatutan, F-FDTL sira iha fatin Ángela nian atu halo ezersísiu kobre iha duni área pramuka ne’e unidade FALINTIL mak ba, entaun normalmente sira halo rekoñesementu no normalmente sira la halo pequeno alto, tanba fatin Ángela nian konsidera hanesan fatin risku.
“Tanba sira halo konsentrasaun, azitasaun no propaganda ne’ebé kuaze monu hodi sai hanesan opozisaun titular ba kargu prezidente ho komandante em-xefe atu familiariza, depois dehan F-FDTL atu kaer no kaer oinsa, se ema sivil ida forsa armada nunka kaer tanba atu kaer ema sivil so tribunal mak fo ordem,” tenik Falur.
Brigadeiru ne’e informa, Ángela hatene dehan atu defende justisa no lia los, tanba sa tenke tauk ho forsa hodi halai, depois akuza dehan forsa mak sala.
“Ami nia karakter patrulla apiada ka motorizada sempre iha pequeno no grande alto ne’ebé planeado intensioanál, la’os atu ba kaer Ângela,” reafirma Vise Xefe Estadu Maiór Jeneral F-FDTL ne’e. Cin
