Prezidente komisaun A Parlamentu Nasionál (PN), Joaquim dos Santos, hateten, maske PN aprova no Prezidente Repúblika (PR), Francisco Guterres “Lú Olo” promulga ona Lei Medidas Prevenção e Combate Corrupção (MPCC) ne’ebé sei vigora iha loron 180 hafoin ninia públikasaun, Maibé Governu presiza kria mós regulamentu suplementár, hodi asegura Comissão Anti Corrupção (CAC) ho sistema servisu tribunal.
“Presiza regulamentu suplementár, nune’e Órgaun Judisiáriu ne’ebé lei fó kompeténsia hodi sira bele servisu di’ak, hodi hala’o sira nia kna’ar, tanba CAC labele halo regulamentu, só bele halo rejimentu internu, bazeia ba lei tempu lejisladór fó loron 180 Governu ou lejisladór sira prepara tan regulamentu sira ka lei sira suplementár atu komplementa lei baze ita halo ona ba CAC“, Reprezentante povu husi bankada FRETILIN ne’e ba jornalista sira iha PN, Tersa (08-09-2020).
Joaquim esplika, kazu hirak ne’ebé uluk akontese molok lei ne’e moris kontinua la’o nafatin tuir prosesu normal, sé iha kazu foun ruma uluk liu molok lei ne’e moris ema ruma lori ba tribunál lei ne’e bele buka tuir.
“Importante sidadaun sira aprezenta ba tribunál planu A no B hanesan nia bosok públiku, tuir loloos halo korupsaun Ministériu Públiku (MP) hala’o servisu tuir lei fó dalan. Ita tenke hein lei ne’e moris lai iha fulan Fevereiru ba oin deputadu sira, PR, Ministru mai to’o iha Xefe Departamentu sira tenke hatama ona rejistu deklarasaun bems antes lei ne’e, iha balun halo ona deklarasaun vale ona, tinan-tinan tenke halo atualizasaun osan husi halo justifikasaun”, klarifika atuál Prezidente komisaun A PN ne’e.
Nia subliña, hso implementasaun lei MPCC ne’e bele ajuda órgaun kompetente sira hala’o kna’ar ho di’ak, hodi ajuda Governu moris iha transparénsia, liu-liu iha setór públiku, inklui setór privadu, hanesan kompañia sira ne’ebé hetan osan husi Estadu liga ho aprovizionamentu sira.
“Setór privadu mós tenke kuidadu ho sira nia hahalok, sé la’e lei bele kona hotu sira, liu-liu iha fraude konstrusaun, ami sira polítiku ne’e liga tráfiku de’it, lei ne’e prevé atu ita labele halo sala, importante lei ne’e ajuda sidadaun barani halo servisu ba setór públiku ho privadu ho fuan”, tenik Joaquim. ety
