Chefe Casa Civil, Francisco de Vasconselhos, hatete, Konsellu Superior Defeza no Seguransa (KSDS), apoia ona Prezidente Repúblika (PR), Francisco Guterres Lú Olo, atu dekreta tan Estadu Emerjénsia (EE) ba dalima, hodi bele prevene transmisaun surtu COVID-19.
“Konsellu Superior Defeza no Seguransa reuniaun ona, diskute hotu sira rekomenda ba Prezidente atu hato’o pedidu Governu nian hato’o ba Parlamentu Nasionál (PN), hodi diskute no haruka mai Prezidente Repúblika atu estende tan EE”, dehan Francisco de Vasconselhos ba Jornalista sira, Tersa (01/09/2020), iha Palásiu Prezidensial Nicolau Lobato, Bairo Píte, Díli.
Nia afirma, pedidu Governu nian atu implementa tan EE ne’e sei haruka ba PN, la-lais liu diak liu tan.
“Ha’u la bele divulga, tanba opinaun ne’ebé KSDS nian ne’e la’ós ba konsumu públiku, tanba ne’e mak ha’u la bele fó sai prosesu diskusaun, maibé sira rekomenda ba Prezidente atu haruka pedidu Governu nian ba PN atu diskute”, tenik nia.
Nia subliña, sira rekomenda signifika sira apoia ka konkorda ho estensaun EE ne’e, estensaun ne’e hanesan ho EE foin dau-daun liu ba foku liu ba fronteira, aeroportu no portu, para kontrola evita transmisaun ba iha sosiedade sira. Oly
