Polísia Nasionál Timor-Leste (PNTL), iha Sesta (11/9/2020), halo kapturasaun ba sidadaun Repúblika Indonézia (RI) na’in rua iha Aldeia Um de Setembru, Suku Villa Verde, Postu Administrátivu Vera Cruz, Munisípiu Díli, tanba la kumpre regra Estadu Timor-Leste (TL) tama kuarentena hodi bele halo teste prevensaun ba moras COVID-19, ne’ebé hamate ona ema barak iha mundu tomak.
Kapturasaun ne’e PNTL hala’o mais ou menus tuku 12 meiudia. PNTL identifika hodi kaptura sidadaun estránjeiru na’in rua ho inisiál mane BR no feto inisiál NT husi Jawa Tengah-Indonézia, na’in rua iha Matadoru, Díli, hodi haruka ba kuarentena, atu nune’e bele halo prevensaun ba COVID-19.
Francisco Villa núdar uma na’in, hateten, ema estránjeiru na’in rua ne’e, aluga uma iha Matadoru, hela komesa iha tinan 2016 to’o agora, maibé iha fulan Jullu, tinan 2020 ne’e, sidadaun na’in rua ne’e ba Indonézia no iha Sesta ne’e nia rona sidadaun estránjeiru na’in rua ne’e fila ona mai Díli hodi hela iha uma Matadoru.
“Uma ne’e ha’u fó ba sira la sala iha tinan 2016 no sira sai ba Indonézia iha dia 8 Jullu 2020, sira fila-fali mak ha’u la hatene tuir, tanba ha’u hatene batas (fronteira) taka. Ha’u rona sira mai horikalan tuku 3 madrugada ne’ebé mak fasilita husi Timor-Oan ida naran Akau iha fronteira”, esplika Francisco Villa núdar uma na’in ba jornalista sira iha Matadoru Díli.
Alende ne’e Xefe Suku Villa Verde, Abdul Mancoli Arranhado, hateten, durante ne’e ema estranjeiru sira hela iha Suku refere, nia laiha koñesimentu.
“Ha’u husu ba Governu atu deporta fila sidadaun estránjeiru sira ne’e ba Indonézia, wainhira tama tiha kuarentena, atu nune’e bele Timor-Oan sira labele hada’et virus corona”, dehan Abdul Mancoli Arranhado. avi
