Prokuradór Jeral Repúblika (PJR), José da Costa Ximenes, hatete, Ministériu Públiku (MP) liu husi Gabinete Sentral Kombate Korupasaun no Kriminalidade, finaliza ona kazu abuzu seksuál ne’ebé komete husi eis padre ho inisiál RD, ba labarik feto minoridade iha Oe-Cusse, tinan 2019 no krime ne’ebé padre ne’e komete hamutuk 14 liu.
“Gabinete Sentral kombate korupsaun no kriminalidade organizada, finaliza tiha ona akuzasaun kontra eis padre ida ho inisial RD, finaliza tiha ona akuzasaun ami tempu badak sei haruka ba Prokuradoria Distrital Oe-Cusse, ne’ebé iha kompeténsia teritorial para julga, krime saida mak ami akuza abuzu seksuál kontra minor ho nia gravasaun, artigu 177 no 182 ho total 14 krime, provavelmente bele liu tan ida ne’e”, PJR ne’e ba jornalista sira, Tersa (22/09/2020), iha Palasiu Prezidensial Nicolau Lobato, Bairo Píte, Díli.
Nia esplika, asaun sivíl deklarativu atu deklara primeiru, estensaun ka taka tiha orfonatu TH, para labarik sira ne’ebé internadu hela iha orfanatu ida ne’e pasa ba responsabilidade Estadu, iha kontekstu ida ne’e iha Ministériu Solidariedade Sosiál no Inkluzaun (MSSI).
“Ha’u hakarak subliña iha ne’e katak akuzasaun ida ne’ebé halo, prosesu ne’ebé ami halo ne’e la kontra Padre hanesan Amu Lulik no Igreja hanesan instituisaun, maibé ida ne’e kontra oknum sira ne’ebé servisu tinan barak nia laran ba igreja hanesan padre”, tenik José. Oly
