Prezidente Repúblika Francisco Guterres Lú Olo, sente triste lakon saudozu Faustino dos Santos “Renan Selac” (Render Nunca A Não Ser Leva A Cabeça), tanba ne’e Xefe Estadu husu ba família no oan sira husi matebian atu forsa nafatin hasoru situasaun ida ne’e, liu-liu lei nafatin proteje família veteranu sira atu hetan tulun ruma husi Estadu.
“Ha’u nia irmão veteranu ida mak mate, tanba ne’e mak ha’u mai ho Prezidénsia Repúblika, partikulamente hanesan veteranu hodi bele hato’o ami hotu nia sentidu votu pezar ba família hotu, hodi hateten ba sira katak, biar nia mate, maibe nia espíritu sei la lakon, hela nafatin. Klaru nia veteranu nia iha lei proteje nia fó saida mak ba, nia iha direitu para atu hetan no nia família sira, saida mak lei hateten, maibe Estadu rasik la haluha nia maluk sira hotu ne’ebé mak mate, no nia família sira ne’ebé mak sei moris”, dehan Prezidente Repúblika Francisco Guterres Lú Olo, ba Jornalista sira, Sesta (11/09/2020), iha Fomentu, Díli.
Nia hatete, iha momentu ida ne’ebé ema hotu lakon maun, alin, aman Renan Selac, fó hateten deit ba família sira laran taridu no susar ne’ebé família sira hotu hetan sente iha momentu ida ne’e, nia rasik nu’udar Prezidente Repúblika no mos veteranu sente mos saida mak família saudozu sente, katak Renan Selac laiha ona iha hotu-hotu nia leet.
“Maibe Renan Selac halo viajen ho ami ida ne’ebé naruk tebes, sakrifísiu oi-oin, terus oi-oin hodi bele to’o mai ohin loron husik hela ita hotu. Nia la’o ho ami ho dignidade bo’ot tebes, ho korajen bo’ot tebes, atu bele luta hodi defende povu ida ne’e, rai ida ne’e ba ukun rasik-an. Renan Selac ho ami hakat liu maluk sira barak ninia isin be monu iha sorin-sorin, oin no kotuk”, realsa Lú olo.
Xefe Estadu ne’e realsa, hakat liu susar sira ne’e hotu, hodi hametin liu tan determinasaun ho korajen bo’ot tebes atu la’o to’o iha rohan Timor ukun rasik-an, maibe ohin laiha ona hotu-hotu nia leet, hakarak atu husik hela deit ba oan sira ne’ebé mak sei iha, Estadu hamutuk ho família sira.
“Ita hotu bele halo reflesaun hanoin fila-fali ba kotuk, atu hateke ba oin saida mak nia hakarak hamutuk ho ami, durante tinan barak nia laran, ha’u hato’o deit, ha’u-nia liafuan badak ida ne’e, ba mak família deside oinsa? sei hato’o fila-fali mai ami, nune’e ha’u-nia liafuan sei tuir dala ida tan ba família sira, ne’ebé durante ne’e Renan Selac moris hamutuk no haksolok ba”, hatutan Lú Olo.
Alende ne’e, Brigadeiru João Miranda “Aluc Descartez”, reprezenta família saudozu haktuir, to’o oras ne’e família seidauk iha desizaun ikus hodi haloot mate-isin saudozu Renan Selac.
“Ita bele dehan desizaun final seidauk, mas entretantu tuir programa mate-isin mai sei lori ba Igreja Comoro halo misa iha ne’eba, depois de missa hotu sei lori ba Parlamentu Nasionál, depois sei lori ba Lospalos para halo rituais tradisionais tuir ita-nia lisan, depois ida ne’e hotu tiha mak atu tuir desizaun ida ne’ebé atu foti, porque ha’u dehan ba ita bo’ot sira katak nia iha oan mane nain tolu, no feto nain tolu, ne’ebé ha’u-nia hakarak sira hotu iha oin mak koalia, para depois iha desizaun sira iha konsensu katak desizaun hanesan para depois aban-bainrua ida labele deside katak sira mak deside ida ne’e, ida mak deside hanesan ne’eba”, tenik Aluc. Oly
