Chefe Casa Civíl, Francisco de Vasconselos, hatete, Prezidente Repúblika (PR), Francisco Guterres Lú Olo, preokupa ho sidadaun sira partikularmente Grupu Arte Marsiál (GAM) ne’ebé tama-sai husi dalan ilegál iha fronteira, tanba bele fó impaktu maka’as ba transmisaun surtu COVID-19 iha rai-laran.
“Prezidente Repúblika konvida Primeiru Ministru, Ministru Defeza, Vise Primeiru Ministru, ho Ministra Negósiu Estranjeiru no Kooperasaun koalia barak liu kona-ba asuntu fronteira, ne’ebé mak sidadaun sira tama-sai ilegál barak, liu-liu iha reasaun ho COVID-19. Tanba ne’e, Prezidente Repúblika diskuti ho Governu sira, oinsa para prevene sidadaun sira labele tan tama-sai ilegál, ho labele lori impaktu ba transmisaun COVID-19, iha sosiedade Timor-Leste”, dehan Francisco Maria de Vasconselos, Kinta (10/09/2020), iha Palásiu Prezidensial Nicolau Lobato, Bairo Pité, Díli.
Nia afirma, sidadaun sira ne’ebé mai husi dalan ilegál, dalaruma bele lori moras husi sira-nia isin, tanba ne’e mak Prezidente Repúblika preokupa ho situasaun ne’e.
“Pontu importante ba enkontru ne’e, maka Governu tenke tau matan, asegura ita-nia fronteira ne’eba para ema sira ne’ebé tama-sai, ne’ebé mak apaña, sira tenke buka tuir, para sira tenke iha kuarentena, hodi evita karik labele iha transmisaun ba ita-nia komunidade sira”, realsa Francisco Vasconselos.
Nia akresenta, hafoin enkontru Governu sei diskuti medida sira tuir seguransa iha fronteira ninian, koalia kona-ba asuntu seguransa ne’ebé mak iha fronteira, aeroportu sira, medida ne’e Governu sei foti tuir buat ne’ebé mak Prezidente Repúblika dekreta ona iha Estadu Emerjénsia, atu nune’e bele impoen regra ba sidadaun sira.
“Prezidente hatene tanba foin dadauk, Prezidente preokupa iha arte marsiál sira sa’e sabuk (sintu) tama-sai. Se tama-sai ilegál hanesan ne’e difisil atu ita kontrola, entaun tenke hola medidas ne’ebé mak forte, atu prevene liu-liu ba iha transmisaun moras COVID-19 ne’e”, tenik tan Francisco Vasconselos. Oly
