Sekretaria Estadu Komunikasaun Sosiál (SEKOMS) sei propoin lei espesífiku kona-ba kombate notísia falsu iha Timor-Leste ba Ministériu Asuntu Parlamentar no Komunikasaun Sosiál (MAPKOMS), atu aprezenta iha Konsellu Ministru (KM).
“Ami iha ona planu espesífiku kona ba lei kombate notísia falsu ne’ebé oras ne’e tékniku sira sei halo hela estudu iha nasaun viziñu sira hodi estuda kona-ba lei espesiál, oinsa regula notísia falsu”, Sekretáriu Estadu Komunikasaun Sosiál, Mericio Juvinál dos Reis Akara, ba GMN, Kuarta (23/09/2020) iha Palásiu Governu, Díli.
Akara dehan, ekipa tékniku oras ne’e halo hela estudu iha Singapura, inklui nasaun sira seluk, hodi foti referénsia oituan kona-ba espesialidade lei regula notísia falsu.
“Iha nesesidade atu regula notísia falsu, maibé SEKOMS presiza hare no estuda referénsia balun hosi nasaun sira ne’ebé iha ona lei kona-ba kombate notísia falsu, maske buat hotu labele rezolve de’it ho lei. Hau koalia hanesan SEKOMS liga ho servisu ne’ebé ami halo ho nia objetivu mak atu asegura sidadaun hotu hosi dezastre lia falsu”.
Alende ne’e SEKOMS mós sei koopera ho média sira atu divulga informasaun ba públiku hanesan meuis ida atu fó hanoin ba públiku katak, atu kuidadu ho informasaun falsu sira bainhira lee notísia ruma tenke haree notísia nia títulu kona-ba saida, notísia refere nia fontes hosi ne’ebé, notísia ne’e kredivel ka lae no média ne’ebé mak públika.
Governante ne’e hatutan, molok atu fahe tutan notísia ruma presiza haree notísia refere ninia impaktu negativu ba iha sosiedade ka lae no karik notísia ne’e iha impaktu negativu mak ema ida-idak tenke iha konsiensia hodi la fahe tutan notísia ne’e, nune’e bele evita informasaun falsu atu espalla barak liu tan.
“Ida ne’e ami hahu lansa hodi kolobora ho média sira atu kontribui mós ba planu ne’e. Hau apela ba komunidade sira atu kuidadu konsumu informasaun no dalan diak liu mak tenke komfirma ho média konvensionál sira hanesan, RTTL-EP, GMN-TV, TVE, inklui média imprime sira ne’ebé mak servisu iha esperensia kleur no iha ona kredibilidade,” dehan Mericio.
Nia realsa, notísia saida deit mak públika iha média sosial facebook, presiza halo komfirmasaun entre notísia iha facebook ho notísia ne’ebé públika hosi média eletroníka sira, nune’e bele halo komparasaun ba notísia entre rua ida ne’ebé mak los, tanba notísia ne’ebé públika iha média eletroníka tais liuhosi redasaun kada média, maibé notísia públika iha facebook laiha redasaun.
“Ami enkoraja públiku atu fiar informasaun ne’ebé públika iha média eletroníka no média imprime maibé ba média online média ne’ebé iha ona lisensa hanesan Ajensia Tatoli-IP”.
SEKOMS iha ona komprimísiu hodi koalia ho parte Igreja, Operadór telekomunikasaun sira, Instituisaun Estadu sira, Parseiru estratejíku SEKOMS, Autoridade Nasionál Komunikasaun, TIC Timor inklui média sira, atu sai parseiru ida ho objetivu kombate lia falsu, nune’e labele destroi harmonía sosiál iha situasaun ida agora.
“Ami laiha intensaun atu apoiu ida ne’e ida ne’eba, maibé buat ne’ebé ami iha mak lia falsu labele destroi harmonia sosiál ne’ebé ita iha, diferensa politika no ídea ida ne’e demokrasia ema nian maibé labele aumenta ho lia falsu atu soran Líder sira ikus sidadaun sira mak sai vítima, tanba ne’e ita presiza fahe informasaun ne’ebé los no kredivel hodi asegura ema hotu hosi informasaun falsu.” Fel
