Polísia Unidade Marítima (UPM) kaptura sidadaun na’in tolu, ne’ebé hatama mina-rai ilegál mai teritóriu Timor-Leste, liu husi área marítima.
Ema na’in tolu ne’e kompostu husi sidadaun Indonézia na’in rua Timor-oan ida.
Sidadaun sira ne’e kaptura iha loron rua nulu resin rua tuku rua madrugada iha área Bee Malae Palaka, Suku Sanirin, Postu Administrátivu Balibo, munisípiu Bobonaro.
Nu’udar evidénsia Polisia UPM prende mina-rai masa hat nulu resin, ne’ebé mak tula husi bero-ai ida hodi transporta mai rai husi área marítima Silawan-Atambua, Indonézia mai Atabae.
Mina-rai ne’e sosa husi sidadaun Timor-oan ida ho inisiál ADS iha hela iha Palaka ho valór dolar Amerikanu atus hat resin.
Sidadaun Indonézia na’in rua ne’e eis Timor-oan, hela iha Silawan-Atambua ho inisiál TP no MM.
UPM transporta mai iha Postu Polísia Marítima iha Atabae no ekipa servisu saúde Atabae, halo dezinfetan molok submete ba prosesu investigasaun, hodi entrega ba Polísia Servisu Investigasaun Kriminál Bobonaro atu kontinua loke prosesu investigasaun no haruka tama kuarentena.
Komandante Polísia Marítima Kompañia Bravo Atabae, Inspetór Xefe Pedro da Cruz, hateten Polísia Marítima kaptura sidadaun sira ne’e, tanba apoiu informasaun husi komunidade Palaka.
“Horikalan mais ou menus dez oras, ami simu informasaun husi komunidade katak, ema hatama mina-rai ilegál. Tanba ne’e ha’u trasa planu hodi hala’o operasaun hodi kaptura mina-rai ilegál ne’ebé mak tula iha bero-ai ida ho ema na’in tolu”, esplika Komandante Polísia Marítima Kompañia Bravo Atabae, Inspetór Xefe Pedro da Cruz ba GMN, Tersa (22/09/20), iha Bea-Cou, Atabae, munisípiu Bobonaro.
Komandante Polísia Unidade Marítima Superintendente Basílio de Jesus, rekoñese UPM menus meius ró, maibé komandante ne’e enkoraza nia membru sira atu kontinua bero komunidade nian hodi kontrola atividade péska no tranzasaun ilegál iha área marítima.
“Servisu UPM ita bele dehan limita tebes meuis ne’ebé mak la sufisiente atu hala’o servisu másimu iha tasi. Dala hira ona ha’u koalia ho kondisaun ida ne’e la sai obstákulu ida ba UPM atu alkánsa nia misaun. Ha’u hanoin Komando jerál mak iha kompeténsia ba iha Ministériu Interiór (MI), hodi haree situasaun sira ne’e. Karik ita hakarak ezije ita nia funsiónamentu servisu UPM iha tasi ho másimu, ha’u hanoin tantu komando jerál PNTL ba to’o iha MI tenke iha uitoan preokupasaun ba iha servisu UPM nian”, dehan Basílio de Jesus.
Evidénsia hanesan mina-rai no ró ne’e oras ne’e iha ona Postu Polísia Unidade Marítima Atabae. avi
