Asidente tráfegu iha área Horai-Kiik, Postu Administrátivu Maubisse, Munisípiu Ainaro, rejulta ema na’in 1 mate no na’in 15 kanek todan no na’in 18 kanek kmaan.
Asidente trafegu ne’e akontese, tanba kondutór baskolante lakon kontrolu, ikus mai kareta halai ses husi estrada hodi ba soke besi protesaun iha estrada ninin, ikus mai kareta baku fila.
Asidente tráfegu ne’e akontese Kinta, loron 2, fulan Setembru ne’e, mais ou menus tuku 09 dadersan, oras Timor-Leste.
“Kareta monu mesak iha Rua Horai-Kiik, Postu Administrátivu Maubisse, ne’ebé rejulta ema na’in 16 kanek grave, na’in 18 kanek kaman bele la’o ba mai bele koalia, tanba tohar oituan no kanek oituan,” informa Komandante PNTL Munisípiu Ainaro Superintendente Justino Menezes, via telefone ba GMN.
Diretóra Ospitál Referénsia Maubisse, Gabriela da Conceição Magno Pereira, hatete, husi vítima sira ne’e, ida mak konsege mate, hafoin transporta hamutuk ho vítima na’in lima husi ospitál referénsia Maubisse ba Díli.
“Mate iha ema na’in ida. Mate mas nia mai tiha ospitál rujuk ba mak mate iha dalan” tenik nia.
Kareta baskolante ne’e nia númeru matríkula 54.061 TL, husi Munisípiu Ermera, Postu Administrátivu Letefoho, tula pasajeiru 34, feto na’in 9, mane na’in 25, ba iha Hatu-Bulico iha loron 1, fulan ne’e, ho objetivu hafolin.
Seksaun Tránzitu Postu Administrativu Maubisse, halo ona identifikasaun ba fatin akontesimentu no dada liña polísia.avi
