Unidade Polísia Maritima (UPM) kaptura sidadaun na’in haat, tanba hala’o atividade ilísitu hodi importa tabaku joker ho ilegál mai Díli, via marítima.
Siadaun na’in haat ne’e, na’in tolu RGC, JS, no RDC nu’udar Timor-oan, na’in ida CM sidadaun Indonézia nu’udar kapitaun béro. Autoridade seguransa kaptura, Tersa (31/08), mais ou menus tuku rua madrugada iha área Dolok Oan, Hera, Munisípiu Díli.
UPM kaptura flagrate delito sidadaun sira ne’e, bainhira hatún hela tabaku joker husi bero ai ida, atu transfere ba kareta-laran. Hafoin ne’e Polísia prende kedas evidensia sira hanesan bero no tabaku joker sira ne’e, transporta kedas ba kuartel UPM, hodi aprezenta ba Ministériu Públiku.
“Tuir informasaun ne’ebé mak ami hetan, ró ne’ebé mak mai iha ema na’in rua de’it mai husi Atapupu, ema sira mai simu sasán ne’e iha ema na’in lima ho truck ida, Suzuki Swift ida no motorizada ida” informa, Komandante Operasionál UPM, Inspetór Xefe Aniceto da Silva, ba GMN iha Dolok-Oan Tersa (31/08).
Suspeitu sira ne’e UPM submete kedas ba proesesu detensaun durante oras 72, iha sela detensaun, molok aprezenta ba Tribunál Distritál Díli (TDD), hodi tuir prosesu primeiru interrogatóriu.avi
