Autor nain lima (5) ne’ebe lori ambon hana ema sira iha tempu kalan hetan kumpri ona sira nia sentensa kriminal iha Tribunal Distrital Dili (TDD).
Autor nain lima ne’e, nain tolu (3) tama prizaun Becora no nain rua (2) seluk hetan Termu Identidade Residensia (TIR) tuir desizaun primeira instansia nian.
Segundu Komandante PNTL Munisipiu Dili, Superintendente Assistente Euclides Belo, ba GMN iha Sede Suku Benonuk, Posto Administrativu Dili, Tersa (17/10/2017), informa katak, polisia kaptura autor nain lima ne’e liga ho rama ambon.
Euclides Belo afirma katak, polisia kontinua hala’o operasaun ba rama ambon no karik indika ema balun ne’ebe deskonfia lori rama ambon no produs rama ambon, tenke informa lalais ba parte polisia ne’ebe besik.
Kona-ba bairo balun iha Dili laran ne’ebe kontinua provoka malu entre grupu joventude sira, Euclides Belo hateten, polisia halao prevensaun nafatin, maibe problema sira ne’e labarik idade ho minoridade mak hanesan goza malu deit mak sira tuda malu.
Iha opurtunidade ne’e mos, Euclides Belo hatete tuir dadus ne’ebe regista iha ministério publiku area Dom Aleixo regista problema Kriminal barak liu kompara ho postu administrativu seluk iha Munisipiu Dili nia laran.
Euclides Belo, informa kona-ba kazu tá joven nain ida iha area Taibessi (Karegatiru), suspeitu identifikadu ona, maibe sei hein mandadu kapturasaun husi ministeriu publiku.
“Suspeitu identifika ona para polisia bele kaer, ami sei promove hotu auto de notisia ba ministeriu publiku para servisu bele klean liu,” hateten Euclides Belo.
GMNTV
Lere: Labele tolera
Xefi Estadu Maior FALINTIL Forsa Defeza Timor Leste (F-FDTL) Major Jeneral Lere Anan Timur, apela atu labele tolera autor kaer rama ambon hodi hana komunidade.
``Hanesan horikalan no horiseik kalan liu ba sira ne´ebé oho malu hana malu krimi organizadu labele tolera, husu mós imi labele involve iha krimi organizadu ida ne´e,”esplika Major Jeneral Lere Anan Timur.
Tanba ne´e, Lere Anan Timur husu, ba se-se mak involve iha krime labele subar fali iha kotuk, wainhira komando PNTL no F-FDTL hetan sei toma medida.
``Ha´u husu ba imi instituisaun rua ne´e atu firmi brani matenek atu bele rezolve situasaun,”dehan Lere Anan Timur.Eus/avi
