GMN TV Justica e Segurança Falur simu pose ba Vise Xefi Estadu Maior F-FDTL

Falur simu pose ba Vise Xefi Estadu Maior F-FDTL

0 views

Brigadeiru Jeneral, Domingos Raul ‘Falur Rate Laek’, Segunda (1/10/18), ofisialmente simu ona pose nu’udar Vise Xefi Estadu Maior Falintil Forsa Defeza Timor Leste (F-FDTL), husi Prezidenti Repúblika (PR), Francisco Guterres ‘Lu Olo’, hodi  troka Filomeno Paixão ne’ebé asumi ona kargu nu’udar Ministru Defeza no Seguransa.

“Brigadeiru Falur Rate Laek ne’ebé uluk hanesan asuwain  funu na’in Falintil nian, iha luta libertasaun nasional mak ofisial ida ho kareira ne’ebé furak tebes hodi servi Forsa Armada no nasaun, alende ne’e nia ema ida   kualidade profisional a’as  tebes hodi halao knaar komando no Estadu Maior nian, no matenek bo’ot kona-ba realidade Falintil F-DTL, liu-liu diresaun no akompañamentu ba kuartel jeneral nia lalaok, ida ne’e atu dehan katak kompetensia atu kaer kna’ar a’as ne’ebé mak fo fiar  ba-nia, tamba ne’e mak  ha’u hakarak hato’o ha’u-nia votu parabens no susesu hodi hala’o ninia misaun”,dehan PR Fransisco Guterres ‘Lu Olo’, liu husi nia diskursu iha Palásiu Prezidensial Nicolau Lobato Bairo Pite Díli.

PR Lu Olo realsa, hala’o nia misaun, forsa Armada  tenki esforsa-an hodi halo kontensaun ba despeza, no uza didi’ak rekursu ne’ebé mak iha.

“Atu hala’o ida ne’e, sira tenki define hikas prioridade sira ne’ebé liga ba afetasaun rekursu, estrutura, maske ho difikuldade oi-oin, ne’ebé militar sira komprende. Nu’udar  Xefi  Estadu  no Komandante Supremu Forsa Armada  sira nian , ha’u sempre haka’as-an tane a’as Forsa Armada  sira nia naran kmanek no dignifikasaun, tamba konsidera nu’udar importante tebes hodi hametin koezaun no unidade Estadu nian  no haforsa identidade Timor-oan”,hatutan PR Lu Olo.

Iha Fatin hanesan Xefi Estadu Maior F-FDTL, Major Jeneral Lere Anan Timur, akresenta, Prezidenti Repúblika fo pose ba Brigadeiru Jeneral Falur Rate Laek  ba assume fali kargu nu’udar Vise Xefi Estadu  Maior  F-FDTL la’os kualker elementu, maibe elementu ida ne’ebé nu’udar sidadaun Timor  ne’ebé espesial, hatudu nia hahalok, servisu, badinas, no nia barani durante tinan 20  resin.

“Ami na’in rua la’os foin mak servisu hamutuk, maibe ami servisu hamutuk kleur ona, ami na’in rua sei iha problema mos ami sei rezolve, se nia sala ha’u krítika nia ba los, no nia la lori ba lia, no nia sei ajuda ha’u  apoia ha’u iha tinan ida nia laran, hodi hala’o kna’ar servi povu Timor Leste”, salienta Lere.

Hafoin simu pose ba  Vise Xefi Estadu Maior Jeneral F-FDTL, Falur Rate Laek, hatete, nia senti normal ba iha pose ne’ebé nia simu, maibe atu tuir kultura iha sentimentu haksolok no triste oituan.

“Xefi Estadu Maior ne’e ema ida ne’ebé hola parte iha instituisaun ida,  no iha vizaun instituisaun defini ona iha konstituisaun no iha Lei Defeza Nasional Seguransa Nasional, to’o iha estatutu sira, ho hakarak forsa ida ne’ebé sai kredível, kapas, operasional no disponivel para bele hala’o  misaun iha kualker momentu”,subliña Falur.

Falur Rate Laek antes ne’e asumi kargu nu’udar Xefi Estadu Maior forsa armada. Falur Rate Laek mós nu’udar membru eis Falintil ne’ebé fó nia kontribuisaun durante funu  luta ba libertasaun nasional.

Falur rate laek moris iha Loihuno, Munisípiu Viqueque, iha loron 9, fulan jullu, tinan 1955, oan ba dala  ha’at husi maun alin na’in 12.

Falur hahú involve-an iha rezisténsia iha tinan 1975 wainhira nia sei iha idade rua nulu organiza populasaun iha baze-Ossu hodi luta ba ukun rasik-an.Oly.


Banner

Foto

Notisia Ikus

Governu sei distribui meza-kadeira ba eskola sira iha territóriu nasionál

May 16, 2022
Governu liuhosi Ministériu Edukasaun Juventude ...

RI-TL konkorda diskute uluk fronteira terrestre

May 16, 2022
Embaixadór Repúblika Indonézia (RI), Okto Dor...

Xanana: Horta sai PR ne’e povu nia vitória

May 16, 2022
Prezidente Partidu CNRT, Kay Rala Xanana Gusmão...

PN haruka Proposta-Lei OR ba PR Lú Olo

May 13, 2022
Parlamentu Nasionál (PN), haruka Proposta-Lei O...

PR eleitu sei deklara TL prontu adopta DFU

May 13, 2022
Prezidente Repúblika (PR) eleitu, José Ramos H...
1 2 3 726

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker