Komandante Jeral Polísia Nasionál Timor-Leste Komisariu Julio Hornay, inaugura uma ba Ofisial Polísia Suku (OPS) iha Suku Bauro, Postu Administrativu Lospalos, Munisípiu Lautem.
Seremonia inagurasaun ne´e hala´o, Segunda (15/10/18), iha fatin lokaliza Suku Bauro, Postu Administrativu Lospalos, Munisípiu Lautem.
Uma Ne´e harii mai husi planu Polísia Nasionál Timor-Leste (PNTL) no finansia husi Governu Nova-Zelandia, ho montante orsamentu rihun tolu nulu resin rua, dolar Amerikanu.
Konstrusaun Uma OPS Suku ne´e, hahú Fulan Novembru 2017, no termina Marsu tinan 2018. Osan refere aloka ba ba operasional rihun ida atus lima no ba infraestrutura rihun tolu nulu resin ida. Balansu ne´ebé mak sei iha banku dolar lima nulu resin sia. sasan sira mak iha uma laran mak hanesan kama, armami, kadeira.
Komandante Jeral PNTL Komisariu Julio Hornay hateten, uma ne´e PNTL nian. Tanba ne´e, membru OPS, ne´ebé mak okupa ne´e hodi hela ténki kuida sasan no uma ne´e.
``Uma ne´e nia funsionamentu ba OPS ho ninia família. OPS bele nia oan, fen mai hotu iha uma ne´e, mas fen ne´ebé mak kazadu ne´ebé mak los, labele lori sel-seluk mai hotu iha ne´e. Xefe Suku toma atensaun ba ha´u nia OPS ne´ebé mak hela iha uma ne´e``,esplika Komandante Jeral PNTL Komisariu Julio Hornay, liu husi diskursu iha seremonia inagurasaun uma ba OPS iha Suku Bauro Munisípiu Lautem.
Julio Hornay, mós husu komunidade atu kontribui ba paz no estabilidade atu nune´e dezenvolvimentu bele la´o.
Entretante Xefe Suku Bauro Sidalio Freitas, senti kontente no orgullu, maske iha Munisípiu Lautem iha Suku 34, maibe Suku Bauro mak hetan projetu ne´e hodi harii uma OPS.
``Ne´ebé ho esforsu tomak komunidade nian ami bele finaliza obra ida,``dehan Xefe Suku Bauro Sidalio Freitas.
Uma Sarjentu Elisio Dias Quintas, nu´udar OPS Suku Bauro, nia mak uza hodi hela, atu nune´e bele garante Seguransa ba komunidade sira.avi
