Komandante Jeral Polísia Nasionál Timor-Leste (PNTL), Komisariu Julio Hornay, hatete, iha planu atu monta seguransa iha área Bugira Suku Nunira, Postu Administrativu Laga, Munisípiu Baucau, hodi fo seguransa ba movimentu transporte públiku ne´ebé mak sirkula husi Lautem atu mai Díli.
Tuir informasaun balun husi pesoal PNTL balun katak, transporte públiku Lautem ninian, labele halo movimentu husi diresaun Díli atu liu ba Lautem tempu kalan, tanba deskonfia iha ameasa husi grupu deskoñesidu iha área Bugira Suku Nunira. Tanba ne´e Komando iha hanoin atu koloka postu ruma.
“Ita nia joven sira iha Laga sira mós aten boot, ha´u fiar katak saida mak sira halo sala, sira sei la halo tan. Ita nu´udar Timor oan labele tauk akontesimentu ida iha Laga, depois ita tauk ona labele lao. Ho akontesimentu ne´e fiar katak, sira sei la halo tan ne´ebé hakarak mós kontribui ba estabilidade nasionál. Komando ninia hanoin atu koloka postu iha ne´eba, postu ida iha Laivai, agora hein katak, Eskuadra Laga bele koordena ho Postu Laivai ninian, hamutuk sira kria seguransa ida iha parte Bugira, bele la’o ba malu kontrola aktividades joven sira iha ne´eba, halo patulhamentu aprosima komunidade hodi tuur hamutuk koalia”,esplika Komandante Jeral PNTL Komisariu Julio Hornay, ba jornalista sira Segunda (15/10/18) iha Suku Bauro Postu Administrativu Lospalos, Munisípiu Lautem.
Lider máximu PNTL ne´e husu Ofisial Polísia Suku, ne´ebé mak koloka iha Nunira ténki funsiona ho di’ak hodi halo aprosimasaun.
``Ita nia joven sira sala ne´ebé mak sira halo ita labele kondena sira ne´e sala nain, ha´u fiar katak, se ita hakbesik sira koalia ho sira kona-ba hahalok atetude la diak bele kriminaliza sira, sei senti katak, sira. Ne´e mak ita ténki konfia malu nafatin sira, tanba sira ita nia oan, tanba sira la´os ema seluk ida”,dehan Julio Hornay.
Antes ne’e, deskonfia membru FALINTIL Forsa Defeza Timor-Leste (F-FDTL), tiru mate joven ida ho naran kompletu Anselmo de Sousa Gama, idade 20, iha Sesta loron 5 fulan Outobru tinan ne´e mais ou menuz tuku 10 ho balun kalan oras Timor-Leste, iha área Bugira, Suku Nunira, Postu Administrativu Laga, Munisípiu Baucau, bainhira membru F-FDTL eskolta hela mate isin saodozu Afonso alias Intel nia mate isin husi Díli atu ba halot iha Lautem, maibe hetan asalta husi grupu deskoñesidu sira.avi
