Komando Polísia Nasional Timor-Leste (PNTL) Munisípiu Díli sei la tolera ema hemu lanu no lori sasan kroat tama semitériu iha loron finadu.
PNTL konsidera komemorasaun finadu hanesan loron istóriku ba ema hotu, liu-liu ba Timor-Leste. Tanba ne´e, Komando Polísia Munisípiu Díli sei garante seguransa ba ema tomak komesa husi loron 1, fulan Novembru misa no loron 2 fulan Novembru, tinan ne´e.
Alende ne´e sei koloka membru seguransa sira iha semitériu Santa Cruz, Becusi no Cacalidun, no sei hetan apoiu seguransa husi estrutura Polísiamentu Komunitária.
``Iha semetériu PNTL proibidu ba maluk sira atu ba semitériu labele lori sasan kroat, labele lori alkohol hemu lanu iha semitériu sira ne´e. Se mak lori alkohol no lori sasan kroat ami sei prende aplika lei númeru 5/2017 armas brankas ba sira”,esplika Segundu Komandante PNTL Munispiu Díli Superintendente Euclides Belo, ba jornalista sira iha Kuartel PNTL, Caicoli, Díli.
Entretantu kona-ba efetivu, Euclides Belo, la esplika sai ba públiku, tanba kestaun tékniku, maibe PNTL sei garante seguransa ba komunidade.
``Ami sei koloka hotu kedas, ami labele diskrimina, semitériu bo’ot ami tau seguransa maka´as liu maibe ba semitériu hotu-hotu. Semitériu ne´ebé natoon ami tau seguransa natoon, semitériu ne´ebé mak bo´ot movimentu barak liu ami tau pesoal barak liu. Tanba ne´e semitériu Santa Cruz ami sei tau seguransa barak liu, tanba sentru iha kapital Díli”,dehan Euclides Belo.avi
