Vise Xefe bankada CNRT, Patrocínio Fernandes, informa, iha posibilidade bankada CNRT sei hato’o pedidu ba Tribunál Rekursu (TR) atu halo pronunsiamentu kona-bá ezisténsia Orsamentu Jerál Estadu (OJE) tinan 2020 tuir konstituisaun RDTL ou lae.
“Ami husu atu tribunál halo pronunsiamentu kona-bá ezisténsia OJE 2020 ne’ebe foin aprova tama iha kontestu konstitusionál ka lae. Ami haree hela ida ne’e iha posibilidade karik ami sei bele hato’o ba iha ne’ebá ami seidauk bele hatete loron serteza, maibé ami sei haree husi aspetu hotu oinsa tuir ami nia ponto de vista, tribunál la presiza ema ruma atu ba hatete, maibé tribunál nia obrigasaun tuir artigu 2 konstituisionál atu hasai nia pronunsiamentu kona-bá ezisténsia OJE”, Vise Xefe bankada CNRT ne’e ba jornalista sira iha Parlamentu Nasionál (PN), Sesta (09-10-2020).
Patrocínio relata, OJE 2020 ne’e presiza TR nia pronunsiamentu no Estadu ida ne’e sidadaun hotu iha nia dever atu hadi’a ka halo koresaun ba eru ruma, nune’e nia parte fiar katak tribunal mós bele ezerse funsaun ho di’ak nu’udár órgaun judisiál.
“Iha situasaun sira hanesan ne’e nasaun ho Estadu presiza sira-nia intervensaun hodi hatete netik buat ruma, tanba sira mak atu asegura lei sira. Tuir ami-nia ponto de vista ne’e katak, tuir loos tribunál la presiza hein ema ruma ba hatete, maibé tribunál iha nia obrigasaun tuir konstituisaun artigu 2 para bele hasa’i nia pronunsiamentu ba aprovasaun proposta OJE 2020”, tenik Vise Xefe bankada CNRT ne’e.
Hatán ba kestaun ne’e, Xefe bankada FRETILIN, Francisco Miranda Branco, afirma, sé sira husu ba TR atu haree ba legalidade proposta OJE tinan 2020 ida ne’e mak lo’os liu, do que ko’alia de’it, di’ak liu halo rekursu ba TR atu nune’e bele pronúnsia.
“FRETILIN prontu ba hatán iha tribunál dezde uluk kedas, tanba Estado de Direito tenke afirmasaun Estadu Direitu Demokrátiku. Tanba ne’e haree ba proposta OJE 2020 ne’ebé aprova ona iha PN ne’e tuir duni lei ne’ebé mak iha” tenik Francisco.
Entretantu OJE 2020 ho montante billiaun USD 1.4 ne’e aprovadu iha PN ho votu a favor 43, kontra 21 no abstensaun 1. ety
