Liu husi leitura akordaun Tribunál Distritál Díli (TDD) kondena arguidu na’in lima ho pena efetivu prizaun ba kondenadu na’in lima, husi tinan 5 to’o tinan 9 prizaun no mós kondena arguidu na’in rua ho pena suspensaun, inklui absolve arguidu na’in rua.
Ba krime sira ne’e, envolve arguidu na’in sia mak hanesan, Joaquim Silva kódigu “Mate Restu”, Osvaldo Paulo, Délio de Jesus Kampus, Mário de Araújo, Domingos Mendonça, Marcelino Pereira, Agustinha da Costa Maria, Celio Noronha Lay no Costantinho de Jesus Maia.
Husi arguidu sira ne’e, iha balun servisu nu’udár funsionáriu iha Ministériu Solidariedade Sosiál no Inkluzaun (MSSI), Sekretariadu Tékniku Administrasaun Eleitorál (STAE), Komisaun Omenajen no mós iha BNU.
Iha leitura sentensa ne’ebé le sai husi juíz António do Carmo Helder, hamonu sentensa ba kondenadu Joaquim Silva kódigu “Mate Restu” ho pena prizaun efetivu tinan 9.
Kondenadu Osvaldo Paúlo pena prizaun efetivu tinan 7, arguidu Délio de Jesus Campos pena prizaun efetivu tinan 6 no arguidu Mário de Araújo no Domingos Mendonça pena prizaun efetivu tinan 5.
Ba arguidu Marcelino Pereira no arguida Agustinha da Costa Maria tribunál kondena pena prizaun tinan 3, maibé suspende ba tinan 3.
Enkuantu arguidu Celio Noronha Lay no Constantinho de Jesus Maia, tribunál absolve husi krime ne’ebé Ministériu Públiku (MP) imputa, tanba konsidera la priense elementu krime.
Iha leitura akordaun ne’ebé fó sai husi juíz prezidente provadu katak, akuzadu sira bosok lezadu sira katak, koñese funsionáriu balun servisu iha Komisaun Omenajen ne’ebé trata la-lais dokumentu pensaun ba martír no sobrevivénsia sira, nune’e lezadu no lezada sira FMC, AS, MMC, JM, MC, TBH no AC hodi entrega osan no inklui kartaun eleitorál, sertidaun batizmu no mós dokumentu importante sira seluk ba arguidu sira ne’ebé ikus mai lezadu sira la hetan osan.
Konsekuénsia husi arguidu sira nia hahalok, rezulta lezadu sira hetan prejuízu pensaun ba sobrevivénsia ho montante (13,800.00+13,800.00+25,590.00+24,862.00+16,185.00=Totál USD $93,547.00) iha tinan 2013 to’o 2017.
Arguidu sira halo levantamentu hodi efetua osan ne’e hahú husi tinan 2013-2017 ho faze dala tolu iha BNU.
Nune’e mós tribunál kondena arguidu sira ho pena prizaun, suspensaun no absolvisaun ne’e bazeia mós ba produsaun prova mai husi deklarasaun arguidu, lezadu no sasin sira-nia.
Tanba ne’e, arguidu sira provadu komete krime Falsifikasaun Agravada (304), Korupsaun Ativa (294), Korupsaun Pasiva ba Aktu Ilísitu (292), Furtu Agravadu (252) no Burla Agravada (267) ne’ebé previstu hotu iha Kódigu Penál Timor-Leste.
Alende ne’e tribunál mós aplika kustu judisiáriu ba arguidu sira, maibé tribunál seidauk fiksa nia kustu. san
