Enkontru Konsellu Seguransa Munisipál (KSM), Kinta (15/10), hodi hala’o prevensaun ba aktu krime sira iha Díli laran.
Komando Polísia Nasionál Timor-Leste (PNTL) munisípiu Díli, organiza enkontru KSM ho autoridade lokal sira, ne’ebé mak marka prezenza husi Administradór postu sira iha munisípiu Díli, Xefe suku no Ofisiál Polísia Suku (OPS), Konsellu Polisiamentu Komunitária (KPK), inklui reprezentante ONG no juventude sira, avalia kona-bá kazu sira ne’ebé mak durante ne’e akontese iha kapitál Díli, oinsá mak atu halo prevensaun, hodi reduz problema sira ne’e.
“Tuir loloos enkontru ne’e realiza kada fulan haat (4) dala ida, maibé tanba COVID-19, tanba ne’e mak ita foin realiza enkontru KSM. Buat ne’ebé mak ita foti mak liu-liu, ita hatene iha Díli laran sempre mosu problema, hanesan grupu sira ataka malu no tuda malu, depois violénsia domestika aas, ita husu para atu servisu hamutuk ho ita-nia líder komunitária sira, ho nune’e bele identifika abut no hun husi problema sira ne’e, depois ita fó solusaun”, esplika Komandante PNTL, munisípiu Díli, Superintendente Xefe Henrique da Costa, iha Sentru Formasaun Polísia Comoro, Díli.
Komandante ne’e akresenta, PNTL ho KPK mós sei hala’o vizita tama sai bairu, atu identifika komunidade sira, nune’e fásil identifika wainhira mosu problema ruma. avi
