Xefe Estadu Maior Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, hatete, Governu tenke kontrola pistola ba Polícia Científica Investigação Criminal (PCIC) nian, ne’ebé to’o ona iha Timor-Leste, tanba sasán funu nian la’os atu halimar.
Lere hatete, tuir konstituisaun RDTL, instituisaun rua hanesan Polísia Nasionál Timor-Leste (PNTL) no F-FDTL mak iha direitu ka’er kilat.
Maske Governu deside sosa kilat ba PCIC, maibé Lere nu’udár elementu seguransa konsidera metódu refere laloos, tanba ne’e Governu li-liu Ministériu Interior no Ministériu Defeza, tenke halo koordenasaun haree problema hirak ne’e.
“Pistola arma ne’e ita nia konstituisaun dehan katak instituisaun rua F-FDTL ho PNTL ne’e mak bele kaer kilat, PCIC ne’e ha’u mós la hatene sé sivíl ka nia militar nia polísia, ha’u dehan katak nia la’ós polísia, tanba foin dau-daun kilat mai ne’e la liu husi polísia sira ne’ebé halo kontratu sira nian kilat tama ona, ne’e ha’u dehan katak Governu tenke kontrola buat sasan sira ne’e, sé la’e abanbainrua ida-idak sosa nia kilat, ida-idak hatama kilat sé PCIC foin dau-daun sira simu kilat ne’e, sira ne’e iha polísia komandu nia okos ka sé nia okos, sira ne’e polísia ka la polísia ida ne’e mak Governu tenke estuda di-di’ak por que materiál de guerra ne’e la’ós buat halimar ne’e ba oho ema abanbainrua sira iha dequido ho ema ruma, sé mak responsabiliza sein dúvida instituisaun responsabiliza”, dehan, Xefe Estadu Maior F-FDTL ne’e iha Palásiu Prezidensiál, Kuarta (14/10/2020).
Antes ne’e, Ministru Defeza, Filomeno Paixão, informa, membru PCIC iha direitu hodi uza arma hirak ne’e, bainhira iha nesesidade no hetan autorizasaun husi instituisaun.
“PCIC instituisaun ida ne’ebé que aprovadu ba Konsellu Ministru (KM) para lori no uza kilat la’ós kilat boot, la’ós kilat naruk sira uza pistola, pistola ha’u rona dehan mai hotu ona aprovadu ona husi Governu, aprovadu iha KM ita implementa de’it, ita uza ita hotu iha regra empeñamentu la’ós kaer para atu tiru arbiru, so uza iha tempu ne’ebé nesesáriu, tanba PCIC todan tebes, PCIC la’ós halo servisu ne’ebé intelijénsia militar servisu, sira-nia servisu sofistikadu tebe-tebes to’o krime sira ne’e que ita matan de’it la konsege hetan ne’e so sira mak bele detekta i sira bele hetan impedimentu barak iha sira nia servisu, tanba ne’e Estadu ou Governu tur halo di’ak i deside para sira tenke iha protesaun”, tenik Ministru Defeza ne’e.
Maske nune’e, antes atu uza arma hirak ne’e membru PCIC sira tenke hetan autorizasaun, tanba instituisaun ida-idak iha nia regra empeñamentu rasik. Ina
