Liu husi alegasaun final Ministériu Públiku ho defeza husu ba tribunal atu absolve arguidu ho inisial PJ ne’ebé deskunfia publika video sexo ho lezada AM ba média sosiál.
Ministériu Públiku ho defeza husu absolvesaun tanba tribunal konsidera katak, wainhira arguidu grava sira nian video la iha reasaun husi lezada, no hafoin fila ba uma arguidu hamos kedas video ne’e. Nune’e Ministériu Públiku ho defeza konsidera arguidu la komete krime devaza tan ne’e sira husu absolve tiha kazu ne’e.
Kazu ne’e akontese tanba arguidu ho lezada halo relasaun íntimu iha Hotel balun iha Díli, arguidu halo gravasaun ho telefone, kona-ba sira na’in rua nia relasaun hodi rai ba privadu. Iha alegasaun final, arguidu deklara katak nia rasik la hatene, tanba sa mak video ne’e bele to’o iha média sosiál, tanba nia rasik nunka iha hanoin atu publika ninia video sexo ne’ebé nia halo ho nia parseiru.
Arguidu mós deklara katak nia hamos ona video husi nia telemovel, wainhira fila uma, nune’e mós sasin sira inklui lezada nia inan rasik mós la hatene kona-ba video sexo ne’e.
Ho ida ne’e Ministériu Públiku ho Defeza husu ba tribunal atu absolve kazu ne’e tanba faktus la priense rekezitus hodi akuza arguidu ba krime devaza ne’ebé previstu iha artigu 183 kódigu penál Timor-Leste.
Julgamentu ne’e adia fali ba loron 20 fulan Novembru tuku 4 loraik, hodi rona desizaun final. Audensia julgamentu ne’e prejidi husi juiz singular José Maria de Araújo, Ministériu Públiku reprezenta husi prokurador Hipolito Santa no arguidu hetan defeza husi advogadu privadu. nia
