Disputa rai iha aldeia 5 tahu laran, suku Caicoli halo Recardina Gonçalves Soares, sai vítima, tanba hetan intervensaun husi Sekretariu Estado Terras Propriedades (SETP) ho razaun katak rai ne’e Estadu nian ho nune’e konstrusaun la la’o kuaze fulan lima, tanba ne’e Recardina deside lori SETP ba Tribunal no konsidera SETP halimar foer ona.
“Iha loron sesta hau ba SETP hau hasoru direktur no dehan mai hau katak karta despaichu husi SETP iha ona maibe parte sira nian sei konfirma lai, tanba despaichu ne’e la klaru mais horiseik lokraik hau simu karta ida husi SETP ne’ebe hau rasik la hatene lolos desizaun, tanba karta ne’e la determina lolos rai ne’e partensia ba Estadu ka Mauhura, maibe karta ne’e hateten deit katak bele kontinua halo kontratu bazeia ba kontratu antes ho Mauhura signifika SETP rekoñese rai ne’e Mauhura nian maibe nusa la hakerek lolos deit katak rai ne’e partensia ba Mauhura lao’s Estadu no tanba saida mak hapara no impede hau nia konstrusaun se kuandu rai ne’e Mauhura, sekuandu hanesan ne’e hau atu selu oinsa tanba kuaze fulan lima nia laran hau la halo konstrusaun, tanba ne’e hau hakarak levanta problema ne’e ba Tribunal maibe lao’s atu kontra Mauhura maibe kontra SETP, tanba sira komesa halimar foer ona iha laran,”dehan Recardina Gonçalves Soares ba GMN iha ninia hela fatin, Balide, Kinta (15/11/2018).
Daudaun ne’e nia hato’o ona keisa ba parte PDHJ no iha tempu badak sei hato’o mos ba Parlamentu Nasional ba komisaun ne’ebe trata asuntu konaba rai atu nune’e labele akontese tan ba ema.
Nia esplika, iha setimu Governu nia hetan despaichu husi SETP hodi autoriza no fo arendimentu signifika setimu Governu rekoñese rai Caicoli ne’e Governu, maibe nusa mak oitavu Governu SETP la rekoñese rai ne’e Governu maibe tanba sa impede konstrusaun.
“Ate agora SETP nunka koalia konaba despaichu ne’ebe iha setimu Governu fo mai hau, maibe Sekretariu Estadu ida agora dehan fali hau halo arendamentu husi kotuk tanba ne’e hau la hatene Governu ida ne’e resmi ka lae,”dehan Recardina.
Antes ne’e, Sekretario Estadu Teras Propriedade (SETP) Mario Ximenes dehan, dadaun ne’e provizoriamente Estado Timor Leste rekoñese Manuel Mauhura mak nain ba rai ne’e, tanba Manuel aprezenta dokumentos ne’ebe selu taxa ba Estado Indonesia iha tinan 1984 to’o 1998 signfika dadaun ne’e Recardina bele halo kontratu arendementu ho Manuel Mauhura hodi hein lei rai numeru 13 ne’ebe sei implementa.Ita
