Primeiru Ministru (PM), Taur Matan Ruak, hateten, governu sei aplika regra ba membru Polísia Nasionál Timor-Leste (PNTL), ne’ebé mak lori kilat, tanba ne’e governu ho instituisaun relevante sei tau hanoin hamutuk oinsa hadia régra sira ne’e.
Xefe Governu, Taur Matan Ruak hato’o asuntu ne’e ba Jornalista sira relasiona trajedia Kuluhun de Baixu, Dili, ne’ebé membru PNTL tiru mate jovens nain tolu inklui hakanek ema nain lima, tanba kazu Kuluhun de Baixu sai referensia ba governu Timor-Leste atu hadia régra ba membru PNTL.
“Iha buat barak ke ita tenki hadia, ne’e mak inklui purizemplu oinsa mak regra lori kilat nian, lori kilat ne’e sirkunstansia saida mak ita lori, ita kuandu ba serimonia ne’e ita lori ga lae, ita kuandu hemu tua ne’e kilat ita tau nafatin iha bolus ka lae, buat sira hanesan ne’e regras bazikus ne’ebé sira tenki hatene para evita kazu sira hanesan ne’e”,informa Primeiru Ministru Taur Matan Ruak ba jornalista sira.
Maske nune’e Primeiru Ministru mos husu nafatin ba entidade hotu atu ajuda no apoia nafatin instituisaun Estadu sira hodi nune’e bele hadia an diak liutan iha futuru.
Entretantu Tribunal Distrital Dili (TDD) iha kuarta (21/11/18) liu husi primeiru interogatoriu deside aplika medida koasaun prizaun preventiva (pp) ba arguidu nain rua ho inisial jm, fs no termu identidade rezidensia (TIR).
Entretantu vítima trajédia Kuluhun de Baixo, hetan tiru iha Domingu (18/11/18) mak hanesan Erick Joni Roberto, Luis Quebia Saldanha Belo ho Leonildo Eduardo Ximenes Sequeira.
Enkuantu vítima nain lima mak kanek hanesan, Terezinha Vila Nova, Pinto Gama, Agrifino da Costa , Paulino de Jesus, Lúcio do Carmo
Família vítima husi trajédia Kuluhun de Baixo, Kuarta (21/11/18), halót ona mate isin iha simitériu Becussi, Díli, ne’ebé hetan tiru husi membru Polísia Nasionál Timor-Leste (PNTL), iha dia 18, fulan Novembru, tinan ne’e.
Entretantu iha Kuarta (21/11/18), Komandante Jeral PNTL, Julio Hornay, afirma hodi fó suspensaun preventiva ba ariguidu nain haat atu fila ba vida sivíl provizoriamente durante fulan tolu sem uza arma hodi submete ba prosesu investigasaun.ías
