Xefe Estadu Maior FALINTIL Forsa Defeza Timor-Leste (F-FDTL) Major Jeneral Lere Anan Timur, konsidera maneira demonstrasaun ne’ebé mak organiza husi Movimentu Universitariu Timor-Leste (MUTL), la tuir dalan.
``Situasaun jeral iha rai laran diak hela apezar iha demonstrasaun, ita aseita demonstrasaun sira ne´e, maibe maneira atu halo demonstrasaun ne´e la tuir dalan, hatudu dalan demokrasia nian”,esplika Major Jeneral Lere Anan Timor ba jornalista sira Kuarta (14/11/18) hafoin enkontru semanal ho Prezidente Repúblika Francisco Guterres Lú Olo iha Palasiu Prezidensial Bairo-Pite Díli.
Alende ne´e, Lere Anan Timur, preokupa ho juventude sira ne´ebé mak ohin loron ne´e sempre provoka malu hodi kria konflitu ba malu hodi rezulta kanek no balun mate.
``Ha´u hanoin katak, tempu oho malu ne´e liu tiha ona. Uluk ita oho malu atu lakohi oho malu, uluk ita funu ne´e Indonesia mak obriga ita funu, la´os ita mak hakarak funu, entaun ita funu atu halakon funu, ne´ebé ita nia juventude ne´e la kleur ita rona iha Becora sona malu, la kleur ita rona Liquiça oho malu, la kleur ita rona Hera oho malu, ne´ebé ita nia juventude presiza edukasaun mentalidade forte atu bele harii ita nia nasaun nia future”,dehan Lere Anan Timur.
Entretantu durante Semana rua estudante ne’ebé hamahon a´an iha Movimentu Universitariu Timor Leste hala´o manifestasaun kontra desizaun Parlamentu Nasionál hodi sosa kareta foun ba deputadu kinta lejislatura. Maibe manifestasaun to´o Kinta (09/11/18), Polísia Nasionál Timor Leste Munisipiu Dili, kaptura estudante 22 no detein iha sela detensaun, tanba deskonfia tuda membru seguransa iha fatin manifestasaun.
Estudante hirak ne´ebé hetan kapturasaun husi Polísia Nasionál Timor Leste munisipiu Dili submete ona ba Primeiru Interrogatoriu no Tribunal Distrital Díli aplika Termu Identidade Rezidensia (TIR).avi
