Xefe Estadu Maior Jeneral Forsa Defeza Timor-Leste (F-FDTL), Major Jeneral (MaJen) Lere Anan Timur, hatun desizaun ba soldadu F-FDTL Eusebio Barros, hodi demite nia husi militar ba vida sivil, tanba falta beibeik servisu.
Soldadu Eusebio Barros tama iha forsa armada iha tinan 2009, no koloka iha Komponente Apoiu Servisu (KAS), maibe depois tama servisu, komando F-FDTL identifika membru ne´e la pro ativu tama servisu. .
Tanba ne´e iha Sesta (16/11/18), lider máximu F-FDTL, Lere Anan Timur, foti desizaun hodi hapara membru ne´e sai husi militar.
Seremonia ne’e hala´o iha Komponente Apoiu Servisu (KAS) Metinaro, ne´ebé mak Lere Anan Timur, fó fiar ba Segundu Komandante Komponente Apoiu Servisu Major Deolindo Amaral ``Serai`` hodi lidera formatura hafoin bolu soldadu Eusebio Barros hasai ninia boña sai husi formatura hodi fila ba vida sivil.
``Iha komponente laran antes ne´e ami prevé kedas, ami lakohi membru sira sai husi ami nia sorin, maibe soldadu Eusebio Barros falta beibeik nia koloka nia iha kompaña Transporte, maibe falta transfere fali nia ba kompaña komunikasaun, bainhira ba iha ne´eba nia falta, depois Polísia Militar ba kaptura tiha lori mai atu muda nia atetude atu bele rekoopera nia sala ne´ebe mak nia halo, maibe nia la koopera. Tanba ne´e mak horseik mak ekipa ida ba kaer fali nia iha Dili lori mai, horikalan iha sela, ohin tuir despaisu selensia Major Jeneral Lere Anan Timur, ohin lee ona bele separa husi servisu ida ne´e”,esplika Segundu Komandante Komponente Apoiu Servisu Major Deolindo Amaral ``Serai`` ba jornalista sira iha Komponente Apoiu Servisu Metinaro.
Entretantu iha tinan 2018 ne´e, desizaun Major Jeneral Lere Anan Timur, konsege hasai ona soldadu nain rua husi komponente Apoiu Servisu, primeiru mak Soldadu Domingos Bolu, husi Ainaro, tanba involve iha artemarsiais tuir fali soldadu Eusebio Barros husi Munisípiu Bobonaro, tanba faltozu.avi
