Movimentu Universitáriu Timór Leste (MUTL) ezije Parlamentu Nasional halo rezolusaun ida hodi hasai armas husi Polisia Nasional Timor Leste(PNTL). Relasiona ho trajedia iha Culuhum de Baixu ne’ebe oknum PNTL uza armas hodi tiru mate jovem nain tolu no hakanek ema nain lima.
Ho trajedia ne’ebe akontese iha Culuhum de Baixu, movimentu ne’e konsidera, PNTL la uza armas sira tuir regra normal PNTL nian.
“Hakarak fo ami nia soliedaridade ba trajedia iha loron segunda madrugada loron 19 fulan novembru nebe oknum Polisia Nasional Timor-Leste, tiru jovem nain 8 konsege rezulta hamate ema nain 3 no nain 5 kanek todan dadaun halo hela tratamentu intensive iha hospital Nasional Guido Valadares. Ami kondena maka’as ba oknum PNTL nebe sempre utiliza armas povu nian hodi sai fali inimigu ba povu iha era independensia. Tenki foti medida urjenti ba polisia nain 4 ne’ebe hatudu hahalok brutalismu, bandalismu iha komunidade nia leet. Ami ezije ba Ministeriu Publiku núdar titular ba prosesu refere hodi aselera lalais prosesu ne’e tuir lei TL. Ami ejije ba Parlamentu Nasional tenki foti medidas regorosu hasoru komandante Jeral Julio Hornai no komandante munisipiu dili, Pedro Belo husi nia kargu. Tenki demite no rejigana an husi kargu hanesan komandante jeral PNTL no komandante munisipiu dili tanba hatudu momos katak sira nain 2 laiha kapasidade atu organiza no profisionaliza instuisuan PNTL nebe harii husi ruin no ran. husu PN hasai rezolusaun ida hasai armas husi PNTL tanba PNTL la uza armas sira ne’e tuir regra normas PNTL nian no diak liu sira uza deit gás lacrimogêneo (Gas airmata-Red) no estik hodi bele asegura no proteje”, hato’o Porta voz MUTL, Maria Elisa Bonaparte, hato’o deklarasaun ne’e liu husi konferensia imprensa iha kampus Universidade Oriental Timor Lorosa’e (UNITAL).
Trajedia Kuluhun ne’e, MUTL mos ezije Parlamentu Nasional atu hasai rezolusaun hodi demite komandante jeral PNTL, Julio Hornai no komandante munusipiu Dili, Pedro Belo, husi sira nia kargu, tanba konsidera laiha kapasidade atu komanda PNTL. ías
