Komandu Polísia Nasional Timor Leste (PNTL) Munísipiu Díli sei garante seguransa ba selebrasaun masakre Santa Cruz 12 Novembru ne’ebe sei selebra iha tinan ne’e, tanba loron ne’e importante ba povu no nasaun.
“Komemorasaun 12 de novembru ami garante seguransa 100%, nune’e mos preparasaun ba 28 novembru mos ami preparadu ona no prontu fo seguransa 24 oras iha momentu ne’ebe deit kalan ka loron ami prontu nafatin”, afirma Segundu Komandante PNTL Munísipiu Díli Superintendente Assistente Euclides Belo, ba Jornalista sira iha nia knar fatin Caikcoli Díli, Kuarta-feira (07/11/2018).
Komandante daruak ne’e dehan, kordenasaun servisu entre PNTL ho estrutura 12 novembru la’o diak tebes kona-ba selebrasaun masakre santa kruz.
“Ba selebrasaun 12 de novembru ami preparadu tiha ona, koordenasaun nafatin komisaun organizadora ba atividade komemorativa ba loron 12 novembru ne’e ami koordena malu daik los no oinsa mak loron importante ne’e la’o ho susesu, tanba ita nia maluk barak mak lakon sira nia vida iha momentu ne’eba”, dehan Euclides.
Tanba ne’e mak komandu PNTL koloka ona pesoal sira liu-liu tranzitu ba fatin sira ne’ebe mak sei hala’o atividade misa no atividade seluk hodi selebra loron istóriku ne’e.
Entretantu fatin seremonia santa kruz mos komandu koloka ona membru evetivu liu-liu forsa rezerva hodi fo seguransa, tanba ne’e mak komandante ne’e garante katak selebrasaun 12 de novembru sei la’o ho ambiente paz no hakmatek. Aes
