GMN TV Justica e Segurança Polísia tiru mate ema nain tolu no hakanek nain lima ■Julio Hornay kondena maka’as

Polísia tiru mate ema nain tolu no hakanek nain lima ■Julio Hornay kondena maka’as

0 views

Membru  Polísia Nasional Timor-Leste  nain rua tiru mate ema nain tolu no hakanek ema nain 5, iha festa koremetan  ida iha Kuluhun de Baixo-Díli, Domingu  (18/11/18),  mais ou menus  tuku 1:30 madrugada oras Timor-Leste.

Mate isin nain tolu lori ona ba Morturáriu hodi submete ba autopsia no vítima ne’ebé kanek hetan hela tratamentu iha Hospital Nasionál Guido Valadares (HNGV).

Membru PNTL nain rua ne’ebé tiru vítima sira mak ida ho inisial FMS  husi Unidade Polísia Marítima no ida seluk ho inisial JSA husi  Servisu Informasaun Polísia.

Vítima na’in tolu ne’ebé mak mate hanesan,  Erick  Joni   Roberto  Bria tinan 24 (kaben na’in),  ne’ebé mak hetan tiru iha ulun fatuk,   Luis Quebin Saldanha Belo tinan 18 (klosan),  no Leonildo  Eduardo  Ximenes Sequeira  tinan 20 (klosan).

Enkuantu vítima na’in lima ne’ebé kanek,  inklui feto ida Terezinha Vila Nova hetan tiru iha liman lós tohar, Pinto Gamu hetan tiru iha parte isin kotuk agora dadaun iha ICU,  Agrefino  da Costa hetan kanek iha parte hasan no Paulino de Jesus  hetan parte kabás,  Lucio do Carmo hetan tiru iha kotuk laran.

Ho akontesimentu ne’e Boby Gonçalves nu’udar família vítima  husi vítima Erick Joni Roberto Bria,  lamenta tebes ho atetude membru Polísia ne’ebé mak lori kilat hodi tiru mate komunidade. Tanba ne’e, família  vítima hakarak prosesa kazu ne’e tuir dalan justisa.

``Ami hakarak  prosesu ne´e ba oin, hodi submete suspeitu sira tuir dalan legal”,dehan Boby Gonçalves, iha Kuluhun de Baixo, hafoin akontesimentu ne’e.

Alende ne´e Komandante Jerál Polísia Nasionál Timor-Leste (PNTL) Komisariu Julio Hornay,  lamenta  ho atetude membru Polísia nain rua ne´ebé mak uza pistola  hodi tiru mate komunidade nain tolu no hakanek nain lima.

Hafoin rona tiha akontesimentu ne´e Komisariu Julio Hornay, haruka dezarma kedas membru nain rua ninia pistola no haruka ona ba detein iha sela detensaun Komando PNTL hodi hala’o prosesu investigasaun hafoin submete ba Tribunal.

``Akontesimentu ida ne´e fora  husi Komando nia hakarak entaun sira prontu atu simu konsekuensia husi aktu ne´ebé mak sira komete. Agora importante mak hotu-hotu hakmatek hodi hein ba última desizaun  ne´ebé Tribunal sei  foti ba individu PNTL involve iha kazu ne´e. Agora medidas cautelares ne´e mak komando foti ne´e mak kompetensia  ne´ebé mak lei fó. Primeiru medidas cautelares dezarmamentu, suspensaun preventiva atu apasta nia husi servisu hotu sei uza armas, sem uza farda so para submete ba investigasaun ita hein rezultadu investigasaun bele mós ameasa ba demisaun, kuandu Tribunal foti ona desizaun”,dehan Julio Hornay.

Julio Hornay mós  kondena  membru nain rua ne´e, tanba lei la fó dalan atu  membru sira  uza armas hodi tiru mate komunidade, kuandu  uza armas ténki ho razaun nesesidade  ne´ebé mak lei haruka.

``La´os uza armas tuir ita ida-idak ninia hakarak se  ita uza tuir hakarak mak simu konsekuensia ho todan”,dehan Julio Hornay.

Ho akontesimentu ne´e, Julio Hornay dehan,  fó impaktu negativu ba imajen instituisaun PNTL.

``Klaru ha´u senti fó impaktu negativu ba PNTL, maibe labele haluha Komando PNTL sei foti medida  forte hasoru individu sira ne´ebé mak koko atu estarga prestijiu instititusaun  ne´e”,dehan Julio Hornay. Antes ne’e, iha tinan 2017, joven ida mós hetan tiru iha Bebonuk.avi

 


Banner

Foto

Notisia Ikus

Singapura mak trava TL tama ASEAN, LUGU: Horta bele konvense

May 18, 2022
Diplomata senior Timor-Leste, José Luis Guterre...

Delegasaun Angola hasoru PR eleitu

May 18, 2022
Prezidente Repúblika (PR) eleitu, José Ramos H...

PR Lú Olo: Tempu ona atu halo revizaun ba K-RDTL

May 18, 2022
Prezidente Repúblika (PR), Francisco Guterres L...

PN aprova Projetu-Lei responsabilidade PR iha finál globál

May 17, 2022
Parlamentu Nasionál (PN) Kinta Lejislatura, apr...

PR Lú Olo kondekora veteranu 83

May 17, 2022
Prezidente Repúblika (PR) Francisco Guterres L...
1 2 3 727

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker