Prezidente Repúblika (PR), Francisco Guterres ‘Lu Olo’, Tersa (20/11/2018), bolu urjenti Komandante Jeral (KomJer) Polísia Nasionál Timor-Leste (PNTL), Komisariu Julio Hornay, relasiona ho trajedia Kuluhun de Baixo ne’ebe membru PNTL tiru mate ema nain tolu no hakanek ema nain lima.
KomJer Julio hornay hateten, iha sorumutu ne’em PR Lú Olo, agradese komandu jeral PNTL ne’ebé foti medidas forte hasoru membru PNTL.
“Ami halo enkontru extraordinaria ida ho Prezidente Repúblika hodi kumpri pedidu husi Xefi Estadu, ho objetivu Prezidenti hakarak hatene informasaun direta husi komandu kona-ba kazu kuluhun de baixo, hodi hatene akontesimentu ne’e la’o oinsa? no komando nia desizaun ba individu ne’ebé sai autor, no mos prosesu investigasaun kriminal ninian la’o oinsa? Tanba ne’e, Prezidenti Repúblika intende ona saida mak akontese, no Prezidenti Repúblika rasik agaradese ba komando nia desizaun foti ona medidas forte ba suspensaun preventiva no kazu kriminal ne’ebé iha ona primeiru interogatoriu no mos apoiu moral ne’ebé fo ona ba família matebian sira”,dehan Julio Hornay hafoin remata enkontru ho Prezidenti Repúblika, iha Palásiu Prezidensial, Bairo Pite, Díli.
Julio Hornay akresenta, komandu mos rejeita no la konkorda aktu husi membru PNTL ne’ebé lori armas (Kilat) hodi tiru ema seluk, tamba ne’e foti ona desizaun ba membru PNTL ne’ebé envolve iha tempu ne’eba, no agora membru PNTL hirak ne’e kumpri hela sela detensaun oras 72, tuir orientasaun Ministériu Públiku, ne’ebé konsidera “Flagrante de litó”, tamba submete ona ba primeriu interogatoriu iha Tribunal Distrital Díli.
“Ita hotu hein desizaun Tribunal nian mai, tamba ida ne’e kompetensia tomak idenpendente ba Tribunal ninian desizaun saida mak tribunal foti ne’e kompetensia, no Prezidenti Repúblika nia hanoin hanesan mos ami nia hanoin lamenta atitude ida ne’e, ne’ebé la serve atu akontese, no ami komandu dezde domingu kedas ami deklara ona ami lamenta no rejeita aktus ida ne’e tamba la prosedural, ne’ebé la merese no la’os tempu atu uza armas hodi tiru ema seluk”,realsa nia.
Nia akresenta liu tan, ho kazu ne’e mak ho sentimentu moral sira hato’o rasik deskulpa ba família no hato’o sentidu kondolensia no mos sei fo apoiu ba prosesu funeral.
“Nune’e mak ohin (Horiseik) ita prepara kaisaun ba ona iha mortuariu para halo’ot ita nia joven sira no ita nia oan sira ne’ebé mak mate, tamba aktus krimi individu PNTL, depois apoiu mos despezas ba funeral ne’ebé halo iha semiteriu Bekusi”,hatutan Julio Hornay.Oly
