Polísia Unidade Patrulhamento Fronteira (UPF), prende kareta illegal tolu ne’ebé mak hatama husi Timor-oan no sidadaun Indonesia liu husi mota Noelekat Oecussi no prende mos atributu Kera Sakti Karon tolu iha fronteira Motain foin lalais ne’e.
Kareta tolu illegal ne’e mak Avanza ida no Carry rua, nune’e agora dadauk asegura ona iha Komando Polísia Nasional Timor Leste (PNTL Oecussi hodi submete ba Tribunal.
“Iha dia 10 fulan ne’e, mais ou menus tuku 3 madrugada, liu husi operasaun ne’ebé mak ami hala’o iha liña fronteira, ita-nia sidadaun Timor-oan balun tenta hatama kareta liu mota Noelekat parte Postu Oesilo, Postu Givisela nian iha klaran, ne’ebé sira tenta hatama kareta tolu Avansa ida ho Carry rua ne’ebé mak hatama iha oras tuku 3 madrugada wainhira iha tempu ne’eba sira tama iha ita-nia teritoriu ita kaer, depois agora ami halo ona prosesu ba Tribunal”,esplika Komandante UPF, Superintendente João Belo ba GMN, Kinta (16/11/18), iha Postu UPF Aeroportu Internasional Nicolau Lobato, Díli.
Alende ne’e, UPF prende atributu artemarisias husi Kera Sakti hamutuk karon tolu, tanba hatama husi sidadaun Indonesia no Timor-oan rasik liu husi dalan ilegal fronteira Motain, entre loron 8 no 9 fulan Novembru, tinan 2018 ne’e.
“Rezultadu operasaun ne’e ami detekta katak, grupu balun tenta mobiliza importa sasan kontra bandu hatama atributu artemarisias Kera Sakti nian hamutuk karon tolu, iha tempu ne’eba ami tenta atu kaptura suspeitu sira, maibe sira halai tiha, ne’ebé montante farda no kalsa faru ne’ebé ami prende paar hamutuk 51 no sertifikadu depois atributu seluk ne’ebé mak hola parte ba Kera Sakti nian”,dehan João Belo.
Atibutu sira ne’e entrega ona ba Komando PNTL Munisípiu Bobonaro no haruka ona ba Ministériu Públiku.
“Hein katak lalais ka neneik ami sei hetan nain ba atributu sira ne’e hodi submete ba tribunal”,dehan tan João Belo.avi
