Komandante Unidade Espesial Polísia (UEP) Superintendente Xefe Afonso dos Santos hateten, atu rezolve problema baku malu entre membru Polísia Militar (PM) ho membru Batallaun Ordem Públika (BOP) foin lalais, ne’e kompetensia líder másimu Polísia Nasionál Timor-Leste (PNTL) no FALINTIL Forsa Defeza Timor-Leste (F-FDTL).
“Statement ne’ebé mak ha’u nia maun bo’ot Lere fó sai ne’e ema ruma mak fó informasaun lalos, ne’ebé atu halo konferensia imprensa ne’e komandante jerál ho Xefe Estadu Maior Jeneral F-FDL, ami sira iha kraik ne’e labele fó statement kona-bá asuntu ida ne’e, tanba ne’e problema instituisaun”,esplika Komandante Unidade Espesial Polísia (UEP) Superintendente Xefe Afonso dos Santos, ba jornalista sira Kinta (14/11/19), iha Kuartel UEP Bairu-Pite Díli.
Afonso dos Santos, konkorda rezolve problema ho internal la presiza lori ba tribunal.
“Ita lori malu ba tribunal halo saida nian, hakarak ba oin ba kotuk instituisaun rua ne’e mak servisu hamutuk país ne’e intende malu”,dehan Afonso dos Santos.
Tanba ne’e Afonso, husu komunidade labele paníku ho problema ne’e.
Husi akontesimentu refere, Afonso dos Santos, la foti desizaun ruma ba nia membru , tanba ne’e kompetensia komandando jerál PNTL.
Problema baku malu entre membru Polísia Militar ho Polísia Batallaun Orden Públika ne’e akontese iha Becusi iha loron 2 fulan Novembru tinan ne’e.
Iha akontesimentu ne’e hetan gravasaun husi kamera CCTV no agora dadauk video ne’e sai viral iha públiku nia matan.avi
