Deskonfia membru Polísia Nasionál Timor-Leste (PNTL) ida tama ilegalmente liu husi fronteira, hafoin ba sa’e sintu iha Indonézia.
“Atu dehan ba ita hotu katak, issu ne’ebé sai problema boot ema hotu nia ibun mak ne’e, buat ida ilegál iha fronteira, ida fali mós individu balun la’o hakur liu fronteira ho ilegalmente ba hasa’e sabuk, maluk sira di’ak liu ita tama iha sistema, do que ita halimar ho sistema”, Segundu Komandante Jerál PNTL, Komisáriu Mateus Fernandes liu husi diskursu, Tersa (10/11/2020), hafoin abertura treinamentu uptidaun fíziku ba membru Unidade Espesiál Polísia (UEP) iha Bairro Píte, Díli.
Segundu Komandante Jerál PNTL ne’e dehan, pior liu fali membru ida husu lisensa ba ninia komandante atu ba Indonézia kona-bá problema partikular, maibé de faktu membru ne’e sai ba Indonézia, hatudu karta lisensa, maibé seidauk hetan aprovasaun husi ninia komandante.
De faktu migrasaun sira iha fronteira fó dokumentu oin seluk ho ninia razaun ida primeiru hateten katak, ba halo serimónia kultura ou adat, maibé ba fali fatin seluk.
Ho nune’e, atu prevene aktu sira ne’e labele akontese tan, Mateus Fernandes apela mós ba membru PNTL hotu atu hatudu nafatin profesionalizmu, hodi hadok-an husi aktu sira ne’e.
Entretantu dau-daun ne’e membru PNTL ne’e submete ona ba prosesu investigasaun iha Komando Jerál PNTL. avi
